Рет қаралды 10,046
1. տարածված սխալները, որ վարորդները գործում են երթևեկության գոտիները փոխելիս.
2. թե ինչպես առավելագույն տեսադաշտ ապահովել մեքենայի շուրջ.
3. թե ինչպես պատշաճ կարգապահություն պահպանել վերադասավորելիս:
Տարածված սխալներ, աղետալի հետևանքներ
Երբ վարորդներն անտեսում են անվտանգ վերադասավորման կարգապահությունը, նրանք ճանապարհը վտանգավոր են դարձնում բոլորի համար: Ընդհարումները հաճախ տեղի են ունենում, երբ վարորդներն ազդանշան չեն տալիս կամ չեն հետևում երթևեկության հոսքին, կամ նրանք ճիշտ չեն վերահսկում տարածությունը նոր երթևեկության գոտի մուտք գործելու ժամանակ: Ոչ անվտանգ վերադասավորումներին բաժին է ընկնում այն բախումների մինչև մեկ հինգերորդ մասը, որոնցում վարորդներն են մեղավոր, իսկ որոշ ավտովարորդներ իրենց մեղքն ընդունում են միայն այն ժամանակ, երբ արդեն չափազանց ուշ է լինում:
Խառը ազդանշաններ
Վարորդի վարքը կանխատեսելը բավականաչափ դժվար է, իսկ սխալ ազդանշան տալն ավելի է բարդացնում իրավիճակը: Ամեն անգամ, երբ վարորդները փոխում են երթևեկության գոտիները, նրանք մուտք են գործում ճանապարհի մի հատված, որը պատկանում է այն արդեն օգտագործող ճանապարհային երթևեկության այլ մասնակիցների: Չափազանց շուտ, չափազանց ուշ ազդանշանելով կամ ընդհանրապես ազդանշան չտալով՝ վարորդներն անորոշ իրավիճակ են առաջացնում երթևեկության մեջ և վտանգավոր են դառնում իրենց շրջապատողների համար:
Չտեսնելու տալը
Մեռյալ գոտիները թաքնված տարածքներ են մեքենայի շուրջ, որոնք չեն երևում հայելիների մեջ, և այդտեղ տեղի ունեցող իրադարձությունները կարող են արագորեն փոխվել: Իրար մասամբ վերածածկող հայելիները կրկնակի են ցույց տալիս տեսադաշտը, իսկ դրանք չափազանց լայն շրջելն ընդարձակում է մեռյալ գոտիներն ու վարորդներին ստիպում ավելի հաճախակի հայացք գցել ուսի վրայով, ինչը նրանց աչքը կտրում է առջևում ընկած ճանապարհից:
Մեռյալ գոտիները զբաղեցնելն ավտովարորդներին ենթարկում է կույր մանևրումների վտանգին, որոնք կատարում են այլ տրանսպորտային միջոցները, հատկապես խոշոր բեռնատարները:
Տարածության անարդյունավետ վերահսկում
Վերադասավորումը միշտ էլ ռիսկային է, իսկ երթևեկության գոտին փոխելիս տարածության անարդյունավետ վերահսկումը խախտում է մյուս ավտովարորդների երթևեկության առավելության իրավունքը: «Պոչից կպած» մեքենավարող վարորդները ոչ անվտանգ վազանց են կատարում կամ զիգզագաձև սլանում են երթևեկության միջով, որպեսզի քիչ ժամանակ խնայեն՝ դրանով իսկ մեծացնելով բախման ենթարկվելու իրենց ռիսկը: Ագրեսիվ մեքենավարումը ամեն տարի բազմաթիվ մահվան ելքով բախումների պատճառ է դառնում Միջին Արևելքի ճանապարհներին:
Կարգապահություն՝ երթևեկության գոտին փոխելիս
Հետևյալ հինգ արդյունավետ միջոցները ձեզ կօգնեն վերադասավորվել անվտանգ կերպով՝
o ճանապարհ ընկնելուց առաջ կարգավորեք ձեր հայելիները, որպեսզի ստանաք հնարավոր լավագույն տեսադաշտը.
o պահպանեք ձեր մեքենայի շուրջ եղած տարածությունը, ուր չպետք է մտնեն ուրիշ փոխադրամիջոցներ.
o նախքան որևէ տրանսպորտային միջոցի վազանցելը անվտանգ հեռավորություն հաստատեք դրա հետևից.
o ճիշտ ազդանշան տվեք և ստուգեք ձեր հայելիներն ու մեռյալ գոտիները վերադասավորման ամեն մի փուլում.
o հնարավորության դեպքում խուսափեք երթևեկության գոտիները փոխելուց:
Վիճակագրությունը
Անակնկալի եկած
Վերադասավորման արդյունքում առաջացող բախումների մինչև 75%-ը ներառում է այն իրավիճակը, երբ վարորդը ժամանակին չի տեսնում բախման վտանգը:
Դանդաղ արձագանքում՝ առանց ազդանշանման
Եթե վարորդները հարկ եղած կերպով ազդանշան չեն տալիս մանևր կատարելուց առաջ, մյուս ավտովարորդներից կարող է պահանջվել մինչև 3 անգամ ավելի շատ ժամանակ՝ այդ մանևրին արձագանքելու համար:
Տարածություն՝ երթևեկության գոտին փոխելիս
80 կմ/ժ արագությամբ ընթացող ավտոմեքենան կարող է սովորական վերադասավորման ժամանակ անցնել 135 մետր տարածություն: Դա ֆուտբոլի դաշտի երկարությունից ավելին է: