Рет қаралды 241,431
Жетісу облысында айдың-күннің аманында кісі қолымен айуандықпен өлтірілген 15 жастағы Құралай Қисабекованың жақындары қылмыскердің туыстары ауылдан көшірілсін деген талап қойып отыр. Үкілеп отырған қызымызды зорлап, өлтіріп, өртеп жіберген күдіктінің туыстарымен бір ауылда жер басып жүре алмаймыз, - дейді қайғыдан қан жұтқан әулет. Естеріңізге сала кетейік, Панфилов ауданының Шолақай ауылында 21 шілде күні жоғалып кеткен оқушы қыздың бір аптадан кейін көмілген жерінен денесі табылып еді.
15 жастағы өрімдей қыз Құралай Қисабекованың азапты өлімі естіген елді есеңгіретті. Оқушы қызды 38 жастағы ауылдасы зорлап, өлтіріп, артынша өртеп жіберген деген күдікпен ұсталды. Бірақ мұндай жауыздықты жалғыз адам істеді дегенге марқұмның туыстары сенбейді. Сондықтан қылмыстық істің жан-жақты зерттелгенін қалайды.
РЫСТЫ МАҚАЖАНОВА, Марқұмның туысы:
- Тергеушінің айтуы бойынша, бір-екі жерінен пышақ тиген, қансыраған сосын, жаңағы өздерінің айтуы бойынша телефонды айғақты жоғалту мақсатында өртеген. Өртеген, қыздың денесіне өрт тиген. Енді соның бәрін бір адам жасау мүмкін емес деген біздің жеке ойымыз. Жалғыз бір адам сондай айуандыққа барады деген адамның миына сыймайды.
Бір аптадан кейін күдіктінің өзі 15 жастағы қызды қай жерде өлтіріп, көмгенін көрсетіп берген. Мұндай сұмдықтан кейін Шолақай ауылының тұрғындарынан маза кетіп, ауылдағы тәртіпті бақылау үшін күштік құрылым келген. Жетісу облыстық Полиция департаментінің баспасөз қызметінің өкілдері қазір де ауылда күштік құрылым қызметкерлері жағдайды бақылауда ұстап тұрғанын растады. Әкімдік те жағдай бақылауда екенін мәлімдеді.
ДУМАН АЛТЫНБЕКҰЛЫ, Жетісу облысы әкімі баспасөз қызметінің өкілі:
- Бұрын сотталған 38 жастағы азамат қамауға алынды. Оның үстінен кәмелет жасқа толмаған қыз баланы зорлау және өлтіру дерегі бойынша қылмыстық іс қозғалды. Жалпы Панфилов ауданында жағдай тұрақты. Облыс әкімшілігінің және құқық қорғау органдарының бақылауында.
Бұған дейін де кәмелеттік жасқа толмаған қыз балаға зәбір көрсеткені үшін істі болып, артынша жақсы тәртібі үшін түрмеден мерзімінен бұрын босап шыққан және көп ұзамай осыған ұқсас қылмыспен ұсталып, ол іс жабылу үшін жәбірленушіге үйленген, енді міне 15 жастағы қызымызды айуандықпен өлтірген күдіктінің туыстарымен бір ауылда тұра алмаймыз дейді, Құралайдың жақындары. Сондықтан, халықты ашындырмай, толықтай ауылдан көшірілсін деп марқұмның жақындары талап қоюда.
РЫСТЫ МАҚАЖАНОВА, Марқұм Құралай Қисабекованың туысы:
- Осы туыстары, бауырлары бар, артында баласы бар, солар ауылдан кетсін. Келесі адамдар сондай жасамау үшін, келесі адам сондай қадамға ойланып баруы үшін сондай бір ең қиын жазалар қолданып, ең ауыр сондай нелермен оларда қиыншылық көрсін. Құралайдың әкесі мен шешесінің Құралайдың артында өсіп келе жатқан іні-сіңлілері бар солардың алдыларынан шығып, естеріне түсіріп, енді қайғыларын қайта-қайта естеріне түсірмеу үшін.
Ал тағдыры қыршыннан қиылған 15 жастағы Құралай бес ағайынды екен, өзі үйдің ортаншысы болған. Ал бұл оның әлеуметтік желідегі парақшасы. Соңғы рет биылғы жылдың 29 мамырында «балалар күніне орай» ұйымдастырылған ашық турнирде күрестен жеңіп алған осы мақтау грамотасын жүктепті.
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#қатігездік #Шолақай