Маңғыстау облысында шекара қызметінің әскери бөлімінде Отан алдындағы борышын өтеп жүріп, қайтыс болған сарбаз Еділ Тешебаевты жақындары бүгін жер қойнына тапсырды. Әскери бөлімдегілер туыстарына 19 жастағы сарбазды өз-өзіне қол жұмсады деп хабарлаған. Тіпті, соңынан хат қалдырып кеткенін де жеткізген. Ал жақындары жас жігіттің өзіне қол салғанына да, хатты өзі жазғанына да сенбейді. Олар мәйітті тексергенде Еділдің асқазаны бос болды дейді. Сондықтан, әскери бөлімде баламызды аш ұстап, қинаған болуы мүмкін деп болжап отыр.
Маңғыстау облысының Бейнеу ауданы, Ақжігіт ауылындағы шекара қызметінде әскери борышын өтеген сарбазды бүгін туған жері Сарыағаш қаласында жер қойнына тапсырды. Бауыр еті баласын жоқтаған ана, еңсесі түскен әке болашағынан үміт күттірген ұлын мәңгілік сапарға қимай жіберді. Ал інісінен айырылған Нұржаусын Тешебаевтың айтуынша, Еділ былтыр қыркүйекте әскерге барғаннан күннен бастап, өмірінің соңына дейін ақша сұраған. Сондықтан, оның өзіне қол жұмсауына сенбейміз дейді. Ал жеңгесі болса хатты сарбаздың өзі жазбағанына кәміл сенімді. Өйткені, қайным маған жеңге емес, жеңеше деуші еді деп еске алып отыр.
ПЕРИЗАТ ДҮЙСЕБАЙ, Еділ Тешебайдың жеңгесі:
- Жолдас балдарының бәріне айтып отырған ғой менде бәрі жақсы уайымдамаңдар деп. Ешнәрсе білдірмеген. Бірақ әр сөзінде трубканы қоятын кезде айтып отырған оларға ескертіп, "мен көрген қорлықты көрмеңдер, бастарың істесе армияға келмеңдер" деп айтып отырған ғой бәріне. Кеше ана зертханада да айтып отыр ғой, әйелдің почеркасы, ұқсатып жазуға тырысқан, үтір-нүктесіне дейін жазған бәрін деп. Ол өйтіп жазбайтын еді хатты. Бәрі көрініп тұр ғой.
Қазір сарбаздың денесінен және жазған хатынан алынған сараптама зерттеліп жатыр екен. Ал ағаларының айтуынша, Еділ Тешебай шымыр, өмірге құштар жігіт болған. Олар мәйітті ашу кезінде Еділдің асқазаны бос болды дейді. Сол себепті, жігіттің асылып өлгеніне сенбейміз, ол аштықтан көз жұмуы мүмкін деп отыр.
БАУЫРЖАН МАНЖАНОВ, Еділ Тешебайдың туысы:
- Осы мәселені бізге шешіп берсін. Біздің бала неге сау кетеді да, аштан қайтыс болады армияда? Біздің әскер, шекара қызметі бір сарбазды тойдыра алмаса, қорғай алмаса менің сөзім жоқ басқа.
Ал Ұлттық Қауіпсіздік Комитетіне қарасты әскери бөлімдегі бұл оқиғаға қатысты ведомства толық ақпарат бермеді. Тек сарбаздың отбасылық мәселелерге байланысты өз-өзіне қол жұмсады деген болжамдарын ғана таратты.
ҚР ҰҚК БАСПАСӨЗ ҚЫЗМЕТІ:
- "4 маусымда ҰҚК Шекара қызметі Маңғыстау облысы бойынша департаментінде мерзімді қызметтің әскери қызметшісі «Т.» өз-өзіне қол жұмсады. Алдын ала ақпарат бойынша, суицидтің себебі әскери қызмет өткерумен байланысты емес. Отбасылық-тұрмыстық проблемалар болған. Құқық қорғау органдары қажетті тергеу амалдарын жүргізуде. Шекара қызметінің басшылығы мен жеке құрамы әскери қызметшінің туыстары мен жақындарына қайғырып көңіл айтады. Марқұмның отбасына қажетті көмек көрсету шараларын қабылдауда".
Туыстары Еділдің отбасылық мәселе үшін өзіне қол салды дегеніне мүлдем сенбейді. Айтуларынша, сарбаздың мойнында белбеудің ізі болған. Мұндай сұмдықты көрген туыстары әскери бөлімде жігіттің мойнын бұрап азаптап өлтірді деп ойлайды. Сондықтан, әділ тергеуді талап етеді. Туған ағасы Нұржаусын ақпаратты таратқаны үшін әскерилер казаға көңіл айтудың орнына, қысым көрсетіп жатыр дейді.
Ал осы қайғылы оқиғадан кейін Президент Қасым-Жомарт Тоқаев Қазақстан армиясындағы әскери қызметкерлер арасында өлім-жітімнің жиілегеніне ерекше назар аударды. Мемлекет басшысы мұндай жәйттарды болдырмау үшін өзінің көмекшісі - Қауіпсіздік Кеңесінің хатшысы Ғизат Нұрдәулетовтің басшылығымен арнайы комиссия құруды тапсырды.
Махаббат Нұржанқызы, Ерлан Қуандықов
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#әскер #әлімжеттік #дедовщина #ҚарулыКүштер