#ShraddhaTV #Seruvila
98 වැනි සේරුවිල ලලාට ධාතු මහ පෙරහැර වීදි සංචාරය කළ වගයි.
අප සම්මා සම්බුදු රජුගේ ශ්‍රීමත් ලලාට ධාතූන් වහන්සේ සහ කේශ ධාතූන් වහන්සේලා දරා වැඩසිටින සේරුවිල මංගල මහා සෑ රජුන් උදෙසා පූජා පිණිස පැවැත්වෙන සේරුවිල ශ්‍රී ලලාට ධාතු මහ පෙරහැර ඊයේ (14) අතිඋත්කර්ෂවත් අයුරින් වීදි සංචාරය කරනු ලැබුවා.
සේරුවිල මංගල රජමහා විහාරාධිපති පූජ්‍ය අළුදෙණියේ සුබෝධි ස්වාමීන්ද්‍රයන් වහන්සේගේ අනුශාසනා සහ මග පෙන්වීම පරිදි විහාරස්ථ දායක සභාව, සේරුවිල මංගල මහා චෛත්‍ය වර්ධන සමිතිය, ත්‍රිකුණාමලය දිසාපති කාර්යාලය ඇතුළු රාජ්‍ය ආයතන, ආරක්ෂක අංශ සහ සැදැහැවතුන්ගේ එකතුවෙන් පෙරහැර කටයුතු සංවිධානය කොට තිබුණා.
අලි ඇතුන් ඇතුළුව විචිත්‍ර නර්තන සහ සංස්කෘතික අංග රැසකින් යුක්තව පෙරහැර මංගල්‍යය අතිඋත්කර්ෂවත් අන්දමින් පැවති අතර මහනුවර ශ්‍රී දළදා මාළිගාවේ ජනරාජා හස්ති රාජයා විසින් සධාතුක කරඬුව වැඩමවනු ලැබුවා. දස දහස් සංඛ්‍යාත සැදැහැවතුන් පිරිසක් මේ උතුම් මොහොතට පැමිණ සිටියා. අධිකරණ අමාත්‍ය ගරු විජේදාස රාජපක්ෂ මැතිදුන් ඇතුළු සම්භාවනීය පිරිසක් ද නැගෙනහිර පළාත් ප්‍රධාන ලේකම්තුමා ඇතුළු රාජ්‍ය නිලධාරීන් රැසක් ද මේ මොහොතට සම්බන්ධ වුණා.