//快必文字獄8月14再開庭，去終審攞受理批准，大家拭目以待！
弟兄姊妹，沒有英雄的時代是悲哀的，但需要英雄的時代更悲哀啊！
6月30號電台聽到家駒嘅「遙望」，快必話好有feel…//
1)有朋友關心快必文字獄嗰單上訴案，律師團隊9號收到通知，翌日即係10號上訴庭會頒布上訴至終院的許可證明書結果。律師團隊好醒目，立即幫快必申請缺席，唔使好似上次失驚無神咁「的」咗佢上去，上場冇靚衫着，點得㗎 ？！
上訴庭話涉案嘅煽動罪為《維護國安條例》下新煽動罪的前身喎，啲爭議值得終院作出裁決㗎，咁咪批出上訴許可證明書囉。嗱，真係有法治㗎香港！ 8月14號終審再開庭，因為係上訴法庭Certified咗三個法律嘅重要議題，我哋要再上去終審法院攞准許嘅決定是否受理案件，大家又再拭目以待啦。
2）今日收到快必7月3號回覆大家嘅來信，信嘅內容係咁嘅。
~老番：你寄信話我係九龍城寨套戲嘅其中一個角色，但我要話俾你知，呢度或者嗰度都冇好打嘅英雄，只有扭曲嘅人性同絕對嘅權力，這不也是九龍城寨的真像嗎？當然，我們需要電影，真實裏也有潘靈卓這種充滿愛心與勇氣的基督徒入去勸人信教戒毒。沒有英雄的時代是悲哀的，但需要英雄的時代更悲哀啊！弟兄姊妹。
~新羊：收到你6月10號嘅postcard，天使和聖母郵票，我好like啊！我冇坐過嗰啲腳揈揈嘅吊車，有冇安全帶嘅呢？會唔會跌死人㗎?!有啲危險咁，唔係好啱我！(相信快必係有啲畏高嘅！ ）
3)之前仲收到各位嘅Postcard，感謝大家去到邊度，都記得我，本來你哋可以好enjoy你哋嘅旅行和假期，但係你記住我以及所有受難者。我感到被愛包圍。
~Teresa：六月尾收到你六月中寄來嘅信。嗰一單扒龍舟新聞好好笑！攞住基本法道具扒龍舟，我諗起依家喺劇院，都有嗰啲人，異曲同工！
~黃鶯媽：收到你228、229嘅信。之前順序嘅信同文章都收到啦。我唔認為「電影中心尋人貼文」係真嘅，我估係電影宣傳手法，嗰個芬蘭導演Aki Kaurismäki就係我個杯茶，「扑頭前失魂後」有冇睇過呢？嗰一個韓國短道速滑男子選手轉國籍，以身為中國人為榮，我都好感動喎！據說，韓國根本自古以來就係中國領土啦，所有韓國人都係中國人吖嘛，佢哋姓金、姓李、姓趙，仲唔係中國人？一定係，除非唔係。
4)生仔：你6月18號嘅信話「好快有結果」，我一早就知結果啦，你呢幾年仲未睇穿咩？你信入邊話「見山仍是山，曲中人未散」令我諗起兩句歌詞：「雨傘是一朵朵的花，不枯也不散。」
~炸蝦尾： 6月21號嘅來信收到啦，有倉鼠嗰一封，多謝你寄信俾我，我想知而家大埔係唔係都有戲院呢？因為黃竹坑同堅尼地城都有戲院了，想知道大埔有冇呢？大埔嘅朋友，一定要告訴我呀！
5)6月30號家駒死忌，打開收音機聽到我注意Like嘅「遙望」：每天多麼多麼的需要，永遠與你抱擁着，忘掉世間一切痛苦悲哀，縱使分開，分開多麼遠，也會聽到你呼喚，期待我這一生再會你。
~Beyond我都好like，仲有「早班火車」、「情人」、「海闊天空」啦，當然。
6)講番讀贏，除咗奧古斯丁，六月尾我都睇完村上春樹嘅「1Q84」。呢類小說，冇所謂劇唔劇透嘅。我睇小說，會揭來揭去揭前揭後咁睇。1Q84係一個年份，對照1984 ， George Orwell嘅1984嗰個年份，亦都係寫監控、寫無形的力量，冥冥中、神秘地牽引男女主角。
~1Q84嗰一年，其實亦都係一個異世界、異空間、異域、異境界，有啲Matrix嘅感覺，又有啲平行時空，兩個世界嘅出入口喺同一條高速公路嘅逃生口，又有啲Harry Potter嗰種神秘月台感覺。讀1Q84就好似睇推理小說，心中一直想解開一啲謎團，所以呢個作品有追看性，係成功嘅、係經典嘅。因為係值得一讀再讀嘅作品，我同船上嘅其他船員討論村上春樹。有啲認為村上春樹後期作品比較有故事性， structure比早期作品好，「挪威的森林」講青春男女情情塔塔，格局太細，冇故事，唔好。但係我就認為「挪威的森林」寫出嘅氣氛，反而接近村上春樹偶像Raymond Carver嗰種氛圍，雖然後期作品故事性結構比較綿密複雜，但係氣氛欠奉。唔知大家點睇村上春樹嘅作品呢？寫信嚟同我一齊分享吓啦！
7）快必嘅回信嚟到呢一度，未到你嘅話，請俾多少少耐性呀。
又到週末，寫開信嘅朋友，知道你哋一有時間都會繼續寫信。如果你好耐冇寫過信嘅話，就快啲拎起紙同筆，加入返筆友嘅行列。如果你仲未寫過信比快必，係時候扚起心肝，唔好懶唔好怕羞。可以將相或者cap圖，insert 喺word document /powerpoint等嘅文書軟件，加埋信嘅內容，打字／或者手寫字都得，用A4紙，彩色印出嚟就可以了。冤獄世界好單調黑暗，灰蚊蚊，有啲彩色嘢睇吓好啲！如果唔知寫乜就買張靚靚嘅卡寄俾佢啦，因為收到你哋嘅信同卡，對大家嚟講係好大嘅支持同鼓勵。
~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！
來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）