Бақыт балалы үйге қонады. 11 баланың анасы Әсел Бекмағамбетова осындай пікірде. Осыдан 3 күн бұрын дүниеге егіз сәби әкелген ақтөбелік ананы бүгін туыстары перзентханадан шығарып алды. Іңгәләп жатқан бұл сәбидің есімі Мұстафа. Сәби қарындасы Аишадан 10 минут бұрын дүниеге келген. Егіздердің салмағы 3,5 келі. Ал үйде оларды тоғыз бауыры күтіп отыр. Алты қыз, үш ұлдың үлкені 19 жаста. Тағы да сәбилі болу жоспарыңызда бар ма?-деген сұраққа көп балалы ана "Алла беріп жатса қашпаймын",-деп жауап қатты. Көп балалы отбасының отағасы Аманжол мұнай компаниясында қарапайым жұмысшы. Отбасының жалғыз асыраушысы да өзі. Ал жұбайы Әсел бала тәрбиесімен айналысады. Пригородный ауылында тұрып жатыр. Екеуі де көп балалы отбасында тәрбиеленген. 11 баланың әкесі Аманжол Бекмағамбетовтың арманы-балаларын оқытып, аяғына тұрғызу. Жарық дүние есігін жаңа ашқан егіздердің де, анасының да денсаулығы жақсы. 38 жастағы әйел өзі босанған. Көп балалы анаға өңір басшысы Б.Сапарбаев құттықтау жолдап, сый-сияпатын беріп жіберген. Қалалық АХАТ бөлімінің мамандары бүгін Мұстафа мен Аишаның ата-анасына туу туралы куәліктерін табыстады. Жыл басынан бері облыстық перинаталдық орталықта 2845 нәресте дүниеге келген. Оның 1352-сі ұл болса, 1493-і қыз бала. Соңғы жарты жылдың ішінде 42 егіз бала дүние есігін ашқан.
Сайт телеканала www.rikatv.kz/
Twitter / rika_kz
Вконтакте rikatv