98. Бәйинә сүресі
Бисмилләһир-рохманир-рохим
1. Кітап берілген қауымнан күпірлік еткендер мен мүшіріктер өздеріне бір ашық дәлел келгенге дейін ажырамаған еді.
2. Алла тарапынан жіберілген пәк парақтарды оқитын елші.
3. Онда ең тура жазбалар бар.
4. Кітап берілгендер, өздеріне ашық дәлел келгеннен кейін ғана бөлінді.
5. Ал олар, ханиф болған түрде Оған діндерін арнап құлшылық етуден, намазды орындаудан және зекетті беруден басқаға бұйырылмаған еді. Міне, осы - туралық діні.
6. Расында, кітап берілген қауымнан күпірлік еткендері және мүшіріктер жаһаннам отында мәңгілік қалады. Міне, солар - жаратылғандардың ең жаманы.
7. Анығында, иман келтіріп ізгі амал жасағандар, міне, солар - жаратылғандардың ең жақсылары.
8. Раббыларының алдындағы олардың сыйлары - астынан өзендер ағып жататын Адн бақтары. Олар онда мәңгі қалушылар. Алла олардан разы, олар да Одан разы. Міне, бұл - Раббысынан қорыққандар үшін.