Жат жерде жерленген қазақтың қос жауынгерінің топырағы туған жерге жеткізілді. Талай шаңырақты шайқалтып, мыңдаған адамды қыршынан қиған екінші дүниежүзілік соғысқа Сырдария ауданынан 7 399 адам аттанған. Батырлық пен қаһармандықтың үлгісін көрсетіп, 4 345 жауынгер жат жерде жан тапсырды. Қанды шайқаста ерлікпен қаза тапқан соғыс ардагері Смағұл Кендірбаев пен Рысқұл Кендірбаевтың топырағы туған жерге жеткізілді.
Жауқазын жастық шағының жарқын кезеңiн оқ пен оттың ортасында өткiзген жандардың бірі - Смағұл Кендірбаев. Ол 1920 жылы Сырдария ауданында дүниеге келген.125-ші атқыштар дивизиясының сарбазы Прибалтика стратегиялық қорғаныс операциясына Литва, Латвияда шекаралық ұрысқа қатысқан. Ленинградтық, Кингисептік-Луждық, Ленинградтық-Новгородтық, Прибалтика стратегиялық соғыс опперацияларында табындылықпен күрескен. Алайда 1944 жылы ұрыс даласында қаза тапқан.
Оқ борап, отқа оранған ұрыс даласында кеудесiн оққа тосқандардың бірі - Рысқұл Кендірбаев.Қатардағы жауынгер Тереңөзек аудандық әскери комиссариатынан жұмысшылар мен шаруалардың қызыл армиясы қатарына шақырылған. Кейін 207 атқыштар полкі, 76 атқыштар дивизиясының сапына алынған.Ақтық демі таусылғанша жауға қарсылық көрсеткен қатардағы жауынгер 1945 жылы 7 мамырда Берлин маңындағы шайқаста ауыр жарақат алып, ерлікпен қаза тапты.
Екінші дүниежүзілік соғыста қаза болған Смағұл Кендірбаевтың денесі Эстония еліндегі бауырластар бейітінде жерленген. Ал Рысқұл Кендірбаевтың жай тапқан жері Германиядағы Ратенау паркі.Хабар-ошарсыз кеткен ағайынды майдангерлердің жерленген орнын «Атамның аманаты» қоғамдық бірлестігі мен ұрпақтары іздеп тауып, бір уыс топырағын туған жерге әкелді. Жауынгер ұрпақтары боздақтардың рухына құран бағыштап, тағзым етті.
Сайт - qyzylordatv.kz/ru/live
Facebook - / qyzylordatv
Instagram - / qyzylordatv
Telegram - t.me/qyzylords_tv
Tiktok - / qyzylorda_tv