Shomanay rayonı 16-sanlı ulıwma bilim beriw mektebinde Ájiniyaz Qosıbay ulınıń 200 jıllıǵı keń túrde belgilendi.
❇️ Qaraqalpaq ádebiyatınıń klassik shayırı, ullı sóz zergeri Ájiniyaz Qosıbay ulınıń tuwılǵanına 200 jıl tolıwına arnalǵan «Bul dúnyanıń kórki adam balası» atamasında ruwxıy-aǵartıwshılıq ilaj bolıp ótti.
Ilajǵa, Qaraqalpaqstan Respublikası Joqarǵı Keńesi deputatı Q.Nawrızov, rayon hákimi orınbasarı, hayal-qızlar bólimi baslıǵı T.Qallıqılıchova, Nuranıy qorı rayonlıq bólimi baslıǵı D.Niyetullaev, “Shomanay nurı” gazetası redaktorı M.Baydullaeva, Málimleme kitapxana orayı direktorı B.Atamuratova, Respublika Ruwxıylıq hám aǵartıwshılıq orayı rayonlıq bólimi baslıǵı I.Allaniyazov, rayonlıq Mektepke shekemgi hám mektep bilimlendiriw bólimi baslıǵı N.Qurbaniyazov hám de nuranıylar, jaslar, oqıtıwshılar hám oqıwshılar qatnastı.
Xabarıńız bar, húrmetli Prezidentimizdiń baslaması menen xalqımızdıń súyikli shayırı Ájiniyazdıń 200 jıllıǵı YUNESKO sheńberinde xalıqaralıq kólemde belgilenetuǵın yubileyler qatarına kirgizilgen edi.
Ilajda sózge shıqqanlar jıynalǵanlardı Ájiniyaz Qosıbay ulınıń 200 jıllıǵı menen qutlıqladı, ómiri hám dóretiwshiligi, shayır shıǵarmalarınıń tek ǵana qaraqalpaq ádebiyatı emes, sonıń menen birgelikte, ózbek, qazaq, túrkmen hám basqa da túrkiy xalıqlar ádebiyatında tutqan ornı, XIX ásirdegi qaraqalpaq ádebiyatınıń rawajlanıwında Ájiniyaz dóretiwshiliginiń áhmiyeti, búgingi kúnde onıń shıǵarmalarınıń úyreniliwi hám keleshek áwladlarǵa jetkeriliwi sıyaqlı máseleler boyınsha bayanatlar jasaldı.
Ájiniyaz Qosıbay ulı dúnyanı tereń hám ótkir tanıp, qaraqalpaq xalqınıń ruwxıy dúnyasınıń bayıwına úlken úles qosqan, ádebiyatımızdı tek ǵana rawajlandırıp qoymastan, qońsılas xalıqlarǵa tanıstırǵan ullı tulǵa bolıp tabıladı.
Ózi jasaǵan dáwirde feodallıq qatnasıqları húkim súrip turǵan bolsa da, onıń aqıl-oyı bir neshe ásir aldıǵa rawajlanıp, «bul dúnyanıń kórki - adam balası» ekenligi haqqında gumanistlik sheshimge kelgenligi de onıń adamgershilik pazıyletlerin kórsetip beredi.
Ol qaraqalpaq ádebiyatında lirika, epikalıq poeziyanı rawajlandırıw menen birge, aytıs janrınıń da sheber dóretiwshisi bolıp tabıladı. Onıń Qız Meńesh penen aytısı shayırlar aytısınıń eń jaqsı úlgisi esaplanadı.
Ájiniyazdıń dóretiwshiligi xalıq arasınan XX ásirdiń 30-jıllarınan baslap jıynala baslaǵan. Dáslepki shıǵarmaları 1949-jılı baspadan shıqtı. Keyingi dáwirlerde 1960-, 1961-, 1965-, 1975-, 1988-, 1994-, 2014-jıllarda shayırdıń tańlamalı shıǵarmalarınıń jıynaǵı baspada járiyalandı. Ájiniyazdıń ómiri hám dóretiwshiligi ilimpazlar N.Dáwqaraev, Q.Ayımbetov, akademikler M.Nurmuhammedov hám H.Hamidov, sonday-aq, Á.Pirnazarov, B.Qálimbetov, A.Murtazaev, K.Mámbetov, Á.Paxratdinov, K.Allambergenov hám basqalar tárepinen ilimiy tiykarda izertlendi.
Ilaj mekteptiń qábiletli oqıwshılar tárepinen shólkemlestirilgen saxnalıq kórinisler hám Mádeniyat bólimi xızmetkerleri atqarıwındaǵı koncert baǵdarlaması menen dawam etti.