#НартайАралбайұлы #NartayNews #НартайНьюс #nartaynews #Еңбекадамы
🔹Спикер: Қайрат ТІЛЕУ - фельдшер.
2019-шы жылы дүниенінің дидары өзгерді. Ақша, байлық, мәнсап мұның барлығы адам үшін екінші, үшінші кезектегі қажеттіліктер екенін ұқтық. Біз өлерменсіп ұмтылып жүрген, біз қомағайлана, дүниеқоңыздыққа салып жүрген іс-әрекеттеріміздің бәрі бекер екен түсіндік. Құндылықтар өзгерді. Бай мен кедейдің мүмкіндігі таразы басында теңесті. Асып-тасқандар да, шалыс басқандар да тәубеге келді. Біз, жаһанның өкпесін қысып, деміктірген дерт коронавирус туралы айтып отырмыз. Әлемде 800 млнға жуық адам індеттің ілмегіне ілініп, өкінішке қарай 7 млннан астамы көз жұмды. Жер шарын үрей билеп, түшкіргеннен қорқатын заман болды. Коронавирус әлі де көше кезіп, салғырттықтың ізін шолып жүргенін ұмытпайық. Хош, сол дерт дендеген уақытта біз денсаулықтың, емін-еркін жүрудің, бастысы дәрігердің қадірін түсіндік. Медицина қызметкерлері күн-түн демей, әр науқастың жаны үшін күресті. Әлі де солай. Оның үстіне қазір тұтас елде қызылша белең алып тұр. Осындайда, сол ақ халатты абзал жандарға төзім тілеп, алғыс айтқы- ақ келеді. Бұл жоба еңбек адамдары туралы болғандықтан, бір санын дәрігерге арнамасақ қателік болар еді. Нағыз еңбектің адамы солар. Ендеше, бүгін біз фельдшер - Қайрат Тілеумен танысамыз.
Бүкіл Қазақстан бойынша 9 мыңға жуық түрлі бейіндегі медицина қызметкерлері жетіспейді. Дәрігерлердің тапшылығы сәл жоғары - 4,5 мың маман. Бұл дегеніңіз, тұтас бір өңірдің кадрлары. Мысалға, Шыңыс Қазақстан облысында бас аяғы төрт мың медицина қызметкері бар. Жыл сайын елімізде бес,алты мың жас маман даярланып шығады. Бірақ, оның бәрі бірдей сол салада еңбек ете бермейді. Әсіресе, ауылды жерге баратындар кемде кем. Сондықтан, барынша қолдау көрсетудің тетіктері жетілдіріліп жатыр. Мысалға, ауылға жұмыс істеуге барған жас дәрігер бірінші айында жеті миллион теңге алады. Аз ақша емес. Ең бастысы сол жастар ауылға ақша емес, тәжірибе жинаймын деп барып, шалғайдағы ағайынның алғысын алса игі.
Өткенде әлеуметтік желіде шу шықты. Есітіп, көрген боларсыз. Еңгезердей бір жігіт жедел жәрдем қызметкерін жолды бөгегені үшін соққыға алған. Бұл оқиға ел арасында қызу талқыланып, көпшілік бұзақыны айыптады. Нәтижесінде, біраз уақыт бой тасалап, қашпақ болған қылмыскер ұсталды. Тиісті жазасын алар. Тап осы жағдайда тұтас елдің бей-жай қалмай, медицина қызметкеріне араша түскені өзімді қуантты. Халық осы бір оқиға арқылы медицина қызметкерлерінің жұмысына құрмет танытып, алғысын білдіргендей көрінді. Расында да, біз кейде сын сойылымен сабап, қызметіне көңіліміз толмай, ауыр сөздер де айтып жатамыз. Әлбетте, басы аурып, балтыры сыздаған адам ашуға булығады. Оның үстіне, дәрігердің бәрі бірдей судан таза, сүттен ақ емес екенін мойындау керек. Бірақ, анығы сол біз ақ халатты жандарға барынша құрмет таныту керекпіз. Себебі, олар біздің басты байлығымыздың сақталуына септесіп, ауырғанда жанымызға араша түсетін адамдар. Мысалға, журналисттің көңіл күйі болмаса, материалы нашар шығуы мүмкін. Бухгалтердің өзі есеп-қисаптан сүрініп жатады. Тағысын тағы мамандықтарда қателік жасап, оны қайта түзеуге болады. Алайда, дәрігердің қателесуге хақы жоқ. Өйткені, оның бір қателігінің артында бір адамның өмірі жатыр. Бүгінгі кейіпкер Қайрат Тілеу сияқты дәрігер азаматтардың қайраты таусылмай, ел үшін еткен еңбегі жемісті бола берсін дегеміз келеді. Сау болыңыздар!
“Еңбек адамы" елеусіз қалмасын! Биыл біз тұтас фильмдер сериясын жасауға бел будық. Басты қолдаушымыз AMANAT партиясы. Кейіпкерлеріміз қарапайым қызметкерлер, бірақ үлкен жүректі, еңбекқор, өмірге құштар адал адамдар. Бұған дейін экрандардан тек өнерпаздар мен шенеуніктерді көретін едік. Бұл дұрыс болмады, олқылықтың орнын толтыру керек. Біз соны мойнымызға алдық. Бұйыртса 40 фильм жарыққа шығады. Көріңіздер!
Интаграм: nartay_aralbayu...
Фейсбук: / nartai.sarsengaliyev