📌Адал еңбектің берекелі жемісі
Ақмола облысы Ішкі саясат басқармасының «Қоғамдық даму орталығы» КММ ұжымы «Еңбек адамы» туралы насихаттау жұмыстарын жалғастыруда.
«Әлемнің әміршісі - еңбек. Тек еңбекпен ғана жеміс өнбек, тек еңбек қана бар қиындықты жеңбек» дегендей адал еңбектің қай түрі болса да өзінің жемісін берері сөзсіз.
Ата-бабаларымыз еңбектің маңызын жете түсініп, өмірден алынған талай мақал-мәтелдерді ұрпақ тәрбиесіне арқау еткен. «Еңбек түбі береке», «Еңбек етсең емерсің» деп балалары мен немерелерінің құлағына құйып, ұрпақтан-ұрпаққа жеткізіп отырғаны шындық.
Еңбек туралы Абай атамыз да өзінің өлең жолдарында «Сен де бір кірпіш дүниеге, кетігін тап та бар қалан» деген болатын. Сол сияқты әр адам өзінің қалаған мамандығын таба білсе, еңбегі жанады, сол жолда бақытқа, құрметке бөленеді.
Бүгінгі Еңбек адамының кейіпкері - Шахмет Құсайынов атындағы Қазақ музыкалық драма театрының актрисасы, ұйымдастырушы, блогер Мақпал Сүлейменова.
Мақпал Айтбайқызы Астана қаласындағы «Шабыт» қазақ ұлттық өнер университетінің түлегі (актриса драмы).
Қазіргі таңда аталмыш театрда адал қызмет атқарып, өнерсүйер қауымның көңілінен шығуда. Сонымен қатар берекелі отбасында екі баланы тәрбиелеп отырған аяулы ана.
Мақпал ханым жан-жақты адам, өз ісінің білікті маманы. Ол үнемі ізденіс үстінде жүре отырып жаңа да тың идеаларды ұсынып, сахнаның көркін беруде.
2014 жылы қосымша табыс табу үшін ізденіп, Той бизнеске де жол тартты. Атап айтар болсақ, халқымыздың Сыңсу, Тұсаукесер, Неке қию және т.б. рәсімдерін нақышына келтіре жүргізіп, шағын тойларды да бақарып келеді.
Мақпал Сүлейменова 2021 жылдан бастап өзінің «Сопрано» триосын құрып, бас солисі болып әуезді әндерін шырқап келеді.
«Театрда жұмыс жасағалы 10 жылдан асып кетті. Істеп жатқан жұмысым өзіме қатты ұнайды. Сомдайтын рөлдер өте көп, соның ішінде ең сүйіктісі - Нурикамал. Екі қызым - қос қанаттарым, олар маған шабыт береді, солар үшін еңбек етемін, барлық жетістіктерімді балаларыма арнаймын», - деп кейіпкеріміз өз ойын түйіндеді.
Бүгінде көрермен қауымның көзайымына айналып, киелі сахнаға нәр беріп жүрген өнер адамы Мақпал Сүлейменеоваға мықты шабыт, шығармашылық табыс тілейміз!