Рет қаралды 320,400
Алматыда туыстарын іздеген адам күн сайын көбейіп келеді. Кейбірі тіпті жақындарын мәйітханадан тауып жатыр. Туғанын жоғалтқандардың тағы бір тобы қаладағы ауруханалардың табалдырығын тоздырып жүр. Солардың бірі Жаңа жылды Алматыда қарсы алып, кейін үйіне қайта алмай қалған Шымкенттік студент. Із-түзсіз жоғалып кеткен 22 жастағы жалғыз ұлдарымен ата-анасы үш күннен бері хабарласа алмай отыр.
Аты-жөнін айтпауды өтінген азамат жұбайымен Шымкент қаласынан келіпті. 22 жастағы студент баласы Алматыға әпкесінің үйіне демалысқа келген екен. 6-шы қаңтар күні Достық көшесінің бойында орналасқан үйден күндізгі 11-лер шамасында нан алуға шығыпты. Сол күйі оралмаған. Әкесінің айтуынша, телефонына қоңырау әлі барып тұр. Бірақ ешкім көтермейді.
Айналдырған 20 минуттың ішінде мәйітханаға алты көлік кіріп, шықты. Тәртіп сақшыларының сөзінше, бұл жер қауіпті болғандықтан ұзақ тұруға болмайды. Ал, мына менің ту сыртымда тұрған адамдар жақындарын тануға келген кісілер. Көбісінің көзінде мұң бар.
Жақынының мүрдесі осында екенін естіген әйел мәйітхана алдында отырып жылап жіберді. Бұл жерге туыстарын, достарын, ет жақындарын іздеп келіп жатқандар көп. Одан бөлек қаладағы ауруханаларды да аралап жүргендер жетерлік. Жоғалған адам туралы туыстары шұғыл түрде бөлімшеге келіп арыз жазу керек дейді полицейлер. Бір түннің ішінде 102-ге 1 мың 370 қоңырау келіпті. Оның 600-ден астамы күдікті туралы ақпарат бергендер.