Демалыс күні Қайрат Байбосынов ағамнан ватсаппен аудиозапись тың етіп келіп түсті. Қосып қалсам, сөзін оқысам да, әнін тыңдап көрмеген, «Ақан серінің Науан Хазіретпен қоштасуы» екен. О Алла, өнердің құдіреті қандай дедім, тыңдап отырсаң қарттыққа бой алдырып, Науан Хазіретпен бақұлдасып, қоштасып отырған Ақан сері бейнесін сол қалпында алып келгендей болды. "Бұрын бұл әнді естідің бе?" деп жазып жіберді, "Жооқ. Бірінші рет естуім. Керемет!" дедім. Сәлден соң ағам қоңырау шалып, "Бұл ән бұрын ешқай жерде айтпап едім, бүгін бірінші рет орындап, өзіңе жібердім" деді. Жариялауға рұқсат алып, ағамның сәлемімен бірге, Ақаннің әнін сіздерге жолдап отырмыз.
Бұл Ақан серінің қоштасуын Жаналы Қалиев жазып, ағамызға ұсынған екен. Жаналы ағамыз туралы көп айтылмағасын мәлімет бере кеткен дұрыс шығар.
Жаналы Ахметұлы Қалиев 1922 жылы Көкшетау облысы, сол кездегі Еңбекшілдер ауданы, Чистяковка ауылында қарапайым қазақ отбасында дүниеге келген. Қосымжан Бабақовтың шәкірті. Соғыс жылдары Иса Байзақовтың отрядында ән салған. Ауылында жеті сыныптық мектепті бітіргеннен кейін колхоз дүкенінде сатушы болып жұмыс істеді. 1942 жылы әскерге шақырылып, алты айлық дайындықтан кейін, 1943 жылдың басында соғысқа аттанады. Десанттық дивизия құрамында майданда болды. Украинадағы Полтава облысы Михайловка ауылын алған кезде ауыр жарақат алады. Кейін Пермь облысына жіберіледі де онда старшина Ж.Қалиев әскерге шақырылушыларды жекпе-жек өнеріне үйретеді. Жеңістен кейін ол үйіне оралып, бірден туған ауылында клуб меңгерушісі болып жұмысқа орналасады, кейін аудан орталығында мемлекеттік сақтандыру инспекторы болып та жұмыс жасайды.
Бала кезінен домбырада ойнауды үйренеді, белгілі қазақ ақын-әншілері -Үкілі Ыбырай, Ақан сері және Біржан салдың әндерін үйреніп, нақышына келтіріп шырқап жүреді.
Қырқыншы жылдардың соңында мәдениет саласының басшылығы Жаналы Қалиев туралы естіп, оны Ақмола облыстық драма театрына, Целиноград қаласына шақырады, содан кейін Қарағанды облыстық драма театрында түрлі рөлдерді ойнайды. Соғыстан кейінгі жылдары Алматы заң мектебіне қабылдау басталғанын онда бірінші кезекте майдангерлер қабылданатынын естіп, оқуға аттанады. Ардагер алғашқылардың бірі болып қабылданып, оқу орнын үздік бітіргеннен кейін үш жыл өткен соң Көкшетау қаласы прокуратурасының тергеушісінің көмекшісі, тергеуші болып жұмыс істеді. Бірақ ешқашан домбырасын тастамай өткен жан екен.
Жалпы Ақан серінің діни өлеңдері бір төбе, ал Науан Хазіретпен екеу ара әңгімелері ел арасында осы күнге дейін айтылып жүр. Кейін олармен де бөлісе жатармыз. Әзір Қайрат ағамыздың орындауындағы мына әнін ұсынамыз.
Қайрат аға сәл сырқаттанып қалыпты, Алла шипасын берсін, ғұмыр жасын ұзақ қылсын! @Саят Ыбырай