#demədidemə #miqren #allergiya
#revamtizma #sağlamlıq #bahadur #təzyiq
Miqren, allergiya, revmatizma və yüksək təzyiq varsa, şəfalı qidalara üz tutun!
Mövsümlər dəyişərkən bəzi xroniki xəstəliklər oyanır. Bu oyanışda qidaların da rolu az deyil. Lakin xəstəliklərin həyat keyfiyyətini sürətlə aşağı salmasına mane olan qidalar da var. Məsələn; pendir, qayğanaq miqren xəstələrinə mənfi təsir etsə də, armud, kivi, kərəviz miqren ağrılarını azaltmaq qabiliyyətinə malikdir. Bu gün miqren, allergiya, revmatizma və yüksək təzyiq kimi durumlarda orqanizmin dəstəkçisi olan qidalardan danışacağam.
Qidalanma vərdişlərini nəzarətdə saxlamaqla xəstəliklərin irəliləməsini 30% azaltmaq mümkündür. Lakin burda diqqət edilməli bir məqam da var: hər orqanizm individualdır. Yəni birinə yaxşı təsir edən digərində mənfi nəticələr yarada bilir. İnsan öz orqanizmini yaxşı tanımalıdır ki, təklif edilən ümumi üsullardan hansının ona faydalı olduğunu anlasın.
Beləliklə, sizə miqren tutmalarını artıran qidaları tanıdım:
-pendir (sərt, hisə verilmiş, duzda saxlanılmış);
-alkoqollu içkilər;
-içalat (içalatdan hazırlanmış yarımfabrikatlar);
-dəniz məhsulları;
-konservlər;
-sitrus meyvələri;
-çox yağlı, bol ədvalı yeməklər;
-kafeinli içkilər (tünd qaraçay, tünd kofe, turş içkilər);
-əncir, kişmiş, avokado, banan, qırmızı gavalı, şokolad;
-fıstık əzməsi;
-bəzi paxlalılar (dən lobya, mərcimək, soya);
Miqren tutmalarını önəmli dərəcədə azaldan qidalar isə bunlardır:
-tərəvəz şorbaları;
-tərəvəz püreləri;
-kərəviz;
-soyutma yumurta;
-armud, alma, kivi;
-çobanyastığı çayı, ballınanə çayı (melisa);
Bunlarla yanaşı, gün ərzində 2-2,5 litr maye qəbul etməyi, ən azından, 30 dəqiqəlik piyada gəzməyi, sutkada 7-8 saat yatmağı da unutmayın.
Revmatizma ağrıları dünya əhalisinin əksəriyyətini narahat edir. Mütəxəssislər bu ağrıların əsarətində qalmamaq, normal gün keçirmək üçün qida rasionu təklif edirlər:
• Balıq. Həftədə, ən azı, 2 dəfə balıq yeyin. Xüsusilə, ton balığı, somon balığı bol miqdarda Omeqa-3 yağ turşuları ilə zəngindir. Onlar iltihablanmanı azaldır;
• Kətan toxumu. Kətan toxumunda Omeqa-3, Omeqa-6 yağ turşuları, lif vardır. Bu sayədə orqanizmin iltihablanma ilə mübarizə gücünü artırır. Burada diqqət edilməli məsələ odur ki, daimi içdiyiniz dərman varsa, kətan toxumu qəbulu barədə həkimlə məsləhətləşməlisiniz;
• Qara quşüzümü. Bitkinin toxumları təbii Omeqa-6 yağ turşuları qaynağıdır. Bəli, qara quşüzümündə olan qamma-linolen turşusu iltihabönləyici kimi çıxış edir. Həmçinin, oynaq şişkinliklərini azaldır;
• Sarıkök və zəncəfil. İltihab əleyhinə təsirli vasitələr olan sarıkök və zəncəfil ağrıkəsicilik qabiliyyətinə də malikdirlər. Artrit xəstələri oynaqlardakı ağrılardan xilas olmaq üçün qida rasionlarından sarıkökü və zəncəfili əksik etməməlidirlər;
• Yumurta. Oynaqların inkişafında xüsusi yeri olan yumurta toxumaların, sümüklərin, oynaqların ehtiyac duyduğu sulfatlarla zəngindir;
Astma, xüsusilə, allergik astma zamanı faydalı olacaq qidaları tanıyaq:
 E vitamin ilə zəngin qidalar. E vitamini immuniteti gücləndirir, ağciyərlərin sağlamlığını qoruyur. Yüksək antioksidant təsirə malik E vitamini bitki mənşəli yağlarda, badamda, soyada, taxılkimilərdə, günəbaxan tumunda, avokadoda, göyərtilərdə bol miqdardadır. Astma əleyhinə dərmanlar orqanizmdə ödəmlər yaranmasına gətirib çıxara bilir. Nəticədə, astma pristuplarının intensivliyi artır. Ödəm yaranıbsa, duzlu və şəkərli qidalardan uzaq durmaq məsləhətdir;
 Maqneziumla zəngin qidalar. Maqnezium ağciyərlər üçün, orqanizmə oksigen daşınması üçün lazımdır. Orqanizmdə maqnezium qıtlığı olanda nəfəs almaq çətinləşir, nəfəs alarkən xırıltı eşidilir. Astma xəstələrinin əksəriyyətində maqnezium çatışmazlığı yaşanır. İspanaq, kahı, kərəviz, dən lobya, xiyar, fındıq, badam, banan maqnezium qaynağıdır;
 Balıq mənşəli Omeqa-3 yağ turşuları. Həftədə 2-3 dəfə balıq əti yeməyi vərdişə çevirin. Bununla yanaşı, rasionunuza qoz ləpəsi, darçınlı su da əlavə edin;
Təzyiq xəstələrinin əllərinin altında olan təbii çarələrdən də danışaq:
• Axşamdan qoz ləpəsini suya qoyun, sabahadək gözləyin. Səhər həmin suyu için. Xolestsrol nizamlanması üçün vacibdir;
• Limonlu su içməyi də yaddan çıxarmayın;
• Gilas, qreypfrut, kivi, şaftalı kimi meyvələri rasionunuza müntəzəm olaraq daxil edin;
• Meyvə dilimlərinə darçın səpəndən sonra yeyin;
• Darçınlı su içməyi vərdişə çevirin;