Рет қаралды 20,457
Алматы облысы Кеген ауданындағы әділетсіздікті тексеруге арнайы комиссия барды
Алматы облысы Кеген ауданындағы ауылдық округ әкімін сайлауға байланысты шыққан дау өрши түсті. Шырғанақ ауылдық округінің жаңа әкімін сайлаудағы келеңсіздікке орай жергілікті халық наразылық танытқан еді. Ауыл белсенділері елдімекенді 4 жыл басқарған Оразбай Бекбатыров жұмысы жалғастырсын деген ұстанымда. Ал Кеген аудандық мәслихатының депутаттары 5 сәуір күні өткен сайлауда 3 мың түтіні бар елдімекенді басқару үшін Қарқара ауылдық округі әкімінде құрылымдық бөлімде 2 жыл ғана еңбек еткен Ернат Сарыбаев деген жас жігітті таңдаған.
Ауылдықтар туған жердің көркеюіне үлес қосқан, жергілікті жұртқа танымал Оразбай Бекбатыровтың орнында қалуын талап етіп, Президент әкімшілігіне хат жазған.
Бүгін аудандағы Шырғанақ ауылына Талдықорғаннан арнайы комиссия барды. Алматы облысы әкімінің нұқсауымен облыстық мәслихаттың хатшысы, Әдеп жөніндегі уәкіл және Алматы облыстық орталық сайлау комиссиясың басшысы тараптарды тауластырмақ болды. Комиссия мүшелері ауылдың бұрынғы әкімі Оразбай Бекбатыров және ауыл ақсақалдары алқасымен екі сағатқа жуық сөйлесіп, бұл дауды өршітпеуді сұраған. Алайда ауыл тұрғындары облыс орталығынан келген комиссиядан әкімді сайлау кезінде әділетсіздікке жол берілгенін айтып, сайлау нәтижесін заңсыз деп тануды талап етумен болды.
Алматы облысы Кеген ауданының әкімі Талғат Байеділов Шырғанақ ауылындағы халықпен кездесуге келген жоқ. Өз кабинетінде сұқбат берген аудан басшысы қалыптасқан жағдайды реттеуге мүдделі екенін, Шырғанақ ауылдық округінің бұрынғы әкімі Оразбай Бекбатыровтың білікті басшы, үздік ұйымдаструшы екенін айтумен шектелді.
Ауыл тұрғындары алдағы уақытта да осы мәселеге қатысты қарсылық шарасын өткізетіндерін мәлімдеді. Олар 5 сәуірде өткен мәслихат сайлауында әділетсіздік орын алғанын мәлімдейді. Мәслихаттағы 12 депутаттың 10-ы - аудан басшылығына бағынышты мекеме жетекшілері екенін ескерсек, желдің қайдан соғатынын аңғару қиын емес. Осы саяси науқанға жауапты болған аудан әкімі, мәслихат хатшысы және аудандық сайлау комиссиясының төрағасын сотқа беру туралы мәселені жақын күндері шешетіндерін айтады