Қазақстан азаматтары Алматы қаласынан кеше шыға амай әлек болса, бүгін кіре алмай әуре. Ел тарихында алғаш рет Алматы, сонымен қатар Астана қалалары оқшауланды. Бүгінгі бас шахарлар бейне бір бөлек Республика сияқты. Шекарамен қоршалған. Көлік пен адам қозғалысын шектеу үшін арнайы блокпосттар орнатылды. Елордада 6 қадағалау бекеті, Алматыда 27 қадағалау бекеті жұмыс істейді, санитарлық-эпидемияға қарсы шаралар күшейеді.
Алматы қаласы әкімінің орынбасары Ерлан Қожағапанов 22 наурыз түнгі сағат 00.00-де қала толық жабылады дейді. Қалаға кіргісі келгендер немесе шығатындар осы уақытқа дейін Алматыға кіріп немесе қаладан шығып үлгеруі тиіс. Бірақ Алтын Ордада орнатылған блокпостан өту бүгін оңай іс емес. Бекетте полицей қызметкерлері, әскери адамдар қорғанысты күшейтті. Облыстан қалаға бет алған әрбір көлік, әр азаматтың құжаттары тексеріледі. Қалада тіркелген тұрғындар немесе жұмыс орнынан рұқсат қағазы барлар ғана шекараны кесіп өте алады дейді. Салдарынан, қалаға кіреберісте адамшошырлық кептеліс орнын алды.
"Халыққа карантин жарияланып, қалаға кіру туралы хабарланып, ескертілгенімен олар жалпы нормаға бағынғысы келмей жатыр. Қазір мен осындамын, жағдай тұрақты", - деді полиция департаментінің ресми өкілі Салтанат Әзірбек.
Алматы облысында, әсіресе қалаға жақын маңда тұратындарды да түсінуге болады. Жалпы нормаға бағыну өте қиын. Шұғыл түрде карантин жариялана салды. Жұмысы Алматыдағылардың күнкөрісі бір сәтте нашарлап кетті. Ешқайда шықпа, үйде отыр дейді. Бірақ отбасы үйде ауа жұтып, қарын тойдырмайды ғой. Жарайды, көреміз. Бастысы, деніміз сау болсын.
Алматы қаласының әкімі, Қазақстан президенті жанындағы төтенше жағдай режимін қамтамасыз ету жөніндегі мемлекеттік комиссияның мүшесі Бақытжан Сағынтаев БАҚ арқылы Алматы тұрғындарына үндеу жасады. Ол Алматыда карантин қалай жұмыс істейтінін түсіндірді.
Сағынтаевтың сөзінше, қала көшелері мен тротуарлар, қоғамдық орындар мен тұрғын үйлер дезинфекциялаланады; Алматы аумағына адамдардың және көліктердің кіріп-шығуы шектеледі; қаланың кіре-берісіне 27 блок бекет орнатылды.
Дегенмен, Алматыға бүгін Іргелі аулы арқылы айналып кіргендердің де саны жетерлік. Олардың айтуынша, жолда ешқандай кедергілер шықпаған. керісінше, қалаға кіру және оның ішінде жүріп-тұру қазір жеңілірек бола түсті. Қала ішінде адам аз. Тұрғындардың басым бөлігі үйден шықпауды ұйғарды. Алматының басты екі проблемасы - кептеліс пен ауаның ластануы осылайша шешілген де сияқты.