РАСМИЙ МУНОСАБАТ
Андижон вилояти Қўрғонтепа туманида бахтсиз воқеа туфайли комбайнга оёқлари кириб кетиш оқибатида шикастланган бемор бир неча босқичли операцияларни навбатдагисини ўтказаётган вақтда вафот этган.
Вилоят соғлиқни сақлаш бошқармасининг ишчи гуруҳи тузилганлиги ҳамда ҳолат ҳуқуқни муҳофаза қилиш органлари томонидан назоратга олиниб, белгиланган тартибга кўра, суд-тиббиёт экспертизаси тайинлангани тўғрисида хабар берилган эди.
Ишчи гуруҳ томонидан юқоридаги ҳолат ўрганиб чиқилмоқда, қуйидагилар аниқланди:
Вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Насибулло Мўминов иштирокида дастлабки “хизмат текшируви” ўтказилди, беморни қабул қилган, даволаган, жаррохлик операциясини ўтказган шифокорлар билан суҳбатлар қилинди, суд-тиббиёт экспертизасининг дастлабки хулосалари, мутахассисларнинг жараён бўйича фикрлари ўрганилди, меъёрий хужжатлар кўрилди.
Қўрғонтепа туман тиббиёт бирлашмаси маъмурияти, даволовчи тиббиёт ходимларидан тушунтириш хатлари олинган, хизмат текшируви давом этмоқда.
2022 йил 9 ноябрь куни соат 15-30ларда Жалақудуқ туманида яшаган Ш.А. комбайн ҳайдовчисининг ёрдамчиси бўлган, резина этик кийган ҳолда далада комбайн томонга макка маҳсулотларини оёғида сурган вақтида, комбайнинг янчувчи қурилмаси тортиб кириб кетган.
Қўрғонтепа туман тиббиёт бирлашмаси шошилинч бўлимининг реанимация бўлимига ётқизилган, шифокорлар консилиумига кўра “D-S: Мураккаб қўшма жароҳатлар, чап сон суягининг пастки 1/3 қисмининг очиқ синиши, юмшоқ тўқималари, тери мускулларни титилиши, чап оёқ 2-3 панжаларининг очиқ майдаланиб синиши, чап сон, болдир,оёк кафти , ўнг болдир соҳасини титилиб йиртилган жароҳатлари, ўнг сон суягини бошчасини ёпиқ чиқиши, травматик шок 2-3 даражаси” ташхиси қўйилиб, бир неча босқичли операциялар тавсия этилган, дастлабки операция муваффақиятли ўтказилган.
Кейинги 2-босқичдаги операция “Ўнг сон суягини бошчасини чиқишини бартараф этиш, жойига солиш” муолажаси ўтказилган, операцияда оғриқсизлантириш томир орқали дори юбориш билан қилинган, операция амалга оширилган “Чиқиб қолган ўнг сон суяги бошчасини ўз жойига солиш” муолажаси тугатилган.
Аммо операция тугаганидан сўнг, беморнинг саломатлик ҳолатида оғирлашиш кузатилган, бемор “Интубация”га олинган, суъний нафас олиш аппаратига уланган, 25 минут давом этган реанимация чораларига қарамай, беморнинг юраги урушдан тўхтаган, ўлим қайд этилган.
Вафот этган бемор Суд-тиббиёт экспертизага юборилган ва 11.11.2022 йил кунидаги № Қ 48-сонли хулоса олинган.
Хулосада ўлим сабаби “Ўпка тромбоэмболияси, бош мия ва ўпка шиши” туфайли эканлиги аниқланган, кутилмаган қоннинг ивиши катта мусибатни келтириб чиқарган.
Тромбоэмболия - бу ивиб қолган қон массасининг юракдан ўпкага чиқиш артерияси - қон томирни тўсиб қолишини натижасида ўпка ва юрак комплекс жараёнлар юракни тўсатдан жуда қисқа фурсатда фаолиятини тўхтатиб қўяди, натижада юракдаги қон ҳам ивиб, юрак камераларини тўлдириб қўйиб, ишлатмайди, бу ҳолатда - тромб кўчиб, тиқилишида шифокорларнинг ҳар қандай уринишлари, амалиётда, ижобий натижа бермаган.
"Электр ўчиши" ўлимга асосий сабаб деб кўрсатиш, тўғри хулоса бўлмайди, чунки операция тугаганидан кейин бир неча вақт ўтиб, кейин электр ўчган, Қўрғонтепа туман тиббиёт бирлашмасида ушбу беморга муолажалар ўтказилаётган операцион хоналардаги барча аппаратлар янги ва замонавий бўлиб, улар электр йўқ бўлса ҳам энг камида 30 минут мустақил ишлайди, баъзиларидаги қувват 4 соатгача етиши мумкин, шу куни заҳира - 2 линия орқали 10 минутдан кейин электр токи тикланган, тиббий фаолиятга тўсқинлик қилмаган.
Андижон вилоят соғлиқни сақлаш бошқармаси матбуот хизмати