Періштелер Аллаға ешқашан қарсы келмейді. Тек Алланың әмірлерін бұлжытпай орындайды да, қандай мақсат үшін жаратылған болса, соны ғана істейді. Үнемі Алланы дәріптеумен, мадақтаумен, тасбих айтумен болады. Періштелердің бұл кейпін Құран аяттары анық түрде біздерге білдіреді. Аяттарда былай дейді: «Өздерінен үстем болған Раббыларынан қорқады. Әрі берілген бұйрықтарды орындайды» (16. «Нахыл» сүресі, 50-аят). «Сонда олар: «Алланың баласы бар» деді. Алла одан пәк. Олай емес, періштелер ардақты құлдары. Олар одан оза сөз сөйлемейді. Сондай-ақ олар Оның әмірін ғана орындайды» (21. «Әнбия» сүресі, 26-27-аят). «(Мұхаммед (ﷺ)) періштелерді ғаршының айналасында Раббыларын дәріптеген түрде көресің» (39. «Зумәр» сүресі, 75-аят). «Періштелер Алланың өздеріне берген әмірлеріне қарсы келмейді. Не бұйырылса, соны орындайды» (66. «Тахрим» сүресі, 6-аят)