Күні кеше аралас жекпе-жектегі 17-ші жеңісіне қол жеткізген Шавкат Рахмоновтың дайындықтары спортты қолдау қорынан қаржыландырылады. Бұл кездесуге дейінгі оқу-жаттығу процесін айтарлық жеңілдетуге мүмкіндік бермек. Әрі әлемге аты шыққан жекпе-жек шеберлері де бұл саланы дамытуға күш саламыз деп ағынан жарылып отыр. Мәселен, кәсіби мансабында бір де бір рет жеңілмеген Шавқат мақсатым елге UFC-дің чемпиондық белбеуін әкелу дейді. Айтуынша, жартылай орта салмақтағы ендігі қарсыластарының ішінде осалы жоқ. Әсіресе, абсолютті жекпе-жек чемпионатының үздік бестігіне кіретін жауынгерлердің әрбірі қауіпті.
Десе де, Шавкат топ бестіктегі кез келген спортшымен кездесуге әзірмін деді. Бірақ чемпиондық белбеуге таласу үшін әлі кемі бір жекпе-жек өткізуі қажет. Өйткені дәл қазіргі уақытта орта салмақтағы бәсеке тым жоғары. Демек, отандасымыз тағы бір қарсыласын ұтып барып қана басты айқасқа жолдама алады. Ал UFC-дегі келесі жекпе-жегі не жаздың соңғы айында, не күздің басында өтуі ықтимал. Қазір Джефф Нилді жеңген Шавкат алтыншы орынға жайғасқан. Сондықтан ендігі қарсыласы UFC рейтингісінің төртінші нөмірі Белал Мұхаммед, не екінші нөмірі Колби Ковингтон болуы мүмкін екен. Әрі отандық спортшы UFC президенті Дана Уайттың қабылдауында болып, алдағы жоспарларымен бөліскен. Сөйтіп, қазақстандық жекпе-жек шеберлерін қолдауды ұсыныпты. Енді жыл соңына дейін тағы бірнеше отандасымыз абсолютті чемпионаттың жауынгерлері қатарын толықтырмақ. Айта кетейік, Шавкат аралас жекпе-жекте 17 кездесу өткізген. Оның сегізінде қарсыласын нокаутқа жіберсе, тоғызын сабмишн әдісімен аяқтаған.
ШАВКАТ РАХМОНОВ, аралас жекпе-жек шебері:
- Қазір немесе 5-6 айдан кейін берсе де титульный бойға шығып кете беремін мен. Мен дайынмын деп ойлаймын. Бірақ енді ЮФС-дегі 77 келі салмақта өте тартысты салмақ. Сондықтан да маған тағы бір бой жеңу керек деп ойлаймын. Содан кейін мен бірден чемпионский поясқа претендент боламын.