12 fevral 2024-cü il tarixində Ermənistan növbəti dəfə təxribata əl atdı. Belə ki, Azərbaycan-Ermənistan şərti dövlət sərhədinin Zəngilan rayonu ərazisindən keçən hissəsində Dövlət Sərhəd Xidmətinin Sərhəd Qoşunlarının Zəngilan rayonunun Kolluqışlaq kəndi ərazisində yerləşən mövqeyinə açılan atəş nəticəsində hərbi qulluqçumuz yaralandı. Məlumata əsasən, atəş Ermənistan Silahlı Qüvvələrinin Qafan rayonunun Nerkin-And yaşayış məntəqəsi istiqamətində yerləşən mövqeyindən açılıb. Fevralın 12-si saat 20:50-də və 23:40-da Ermənistan silahlı qüvvələrinin bölmələri bu dəfə Tovuzqala rayonunun Çinarlı yaşayış məntəqəsi istiqamətində yerləşən mövqelərindən Ordumuzun Tovuz rayonunun Koxanəbi yaşayış məntəqəsi istiqamətində yerləşən mövqelərini atıcı silahlardan atəşə tutdu. Bu təxribatlara cavab olaraq Dövlət Sərhəd Xidmətinin (DSX) bölmələri fevralın 13-də “Qisas əməliyyatı” həyata keçirdi. Məlumata görə, əməliyyat nəticəsində əsgərimizə atəş açılan Ermənistan Silahlı Qüvvələrinin Qafan rayonunun Nerkin-And yaşayış məntəqəsinin yaxınlığındakı döyüş postu tamamilə darmadağın edilib, döyüş mövqeləri susdurulub. Ermənistan Müdafiə Nazirliyi Azərbaycanla şərti sərhəddə ölən hərbçilərinin 4 nəfər olduğu barədə məlumat yayıb. Daha bir hərbçisi isə yaralanıb.
Qeyd edək ki, Ermənistanın baş naziri Nikol Paşinyan fevralın 11-də “The Telegraph” nəşrinə müsahibəsində İrəvanın Bakı ilə sülh müqaviləsini imzalamağa hazır olduğunu demişdi. Ancaq sülh təşəbbüsündən çox Azərbaycana qarşı təxribat və böhtan xarakterli əsassız iddialar səsləndirmişdi. Ardınca bu cür təxribata imza atmaq Ermənistanın sülh niyyətinin real olmadığını göstərir.
Xüsusi vurğulanmalıdır ki, Aİ-nin Ermənistanda missiyasının fəaliyyətə başlaması ilə Ermənistanın revanşist addımları daha da genişləndi. Sanki erməni hakim dairələri bu missiyanın fəaliyyətə başlaması ilə daha da “cəsarətləndi”. Azərbaycan Aİ missiyasının gəlişinin regionda vəziyyətin sabitləşməsinə yox, gərginləşməsinə xidmət edəcəyini dəfələrlə bildirib.
Ermənistan tərəfi Praqa və Soçi görüşlərində və daha sonra Azər-baycanın ərazi bütövlüyünü tanıdığını bəyan etsə də, bu günədək beynəlxalq təşkilat və məhkəmələrdə Azərbaycanın suve¬renliyi və ərazi bütövlüyünə qarşı iddiaları davam etdirməkdədir. 30 il ərzində Ermənistanın işğalçılıq siyasətinə irad bildirməyən, 1 milyondan artıq azərbaycanlı qaçqının taleyi ilə maraqlanmayan Qərb indi erməni amilini əlində bayraq edərək regiona daxil olmağa çalışır, Cənubi Qafqazda real olan sülh prosesinə əngəl törədir.
Kənar güclərin təsiri altında hərəkət edən Ermənistan rəhbərliyi anlamalıdır ki, bu cür təxribatlar vəziyyəti gərginləşdirir və Ermənistanı uçuruma doğru sürükləyir. Əgər Ermənistan Prezident İlham Əliyevin dəfələrlə xəbərdarlıq etdiyi kimi, Azərbaycana qarşı hansısa revanşist addım atacaqsa, bizə qarşı qisasçılıq müharibəsinə cəhd edəcəksə, sərt şəkildə cəzalanacaq. Azərbaycan üçün münaqişə bitib, Ermənistanla müharibə səhifəsi arxada qalıb. Azərbaycan Ermənistanla qonşuluq şəraitində yaşamağa üstünlük verən addımlar atır, amma Ermənistan bundan sonrakı seçimini özü etməlidir. Azərbaycan bu gün regionda yeni bir reallıq formalaşdırıb. Ermənistan Qərbin fitnəsinə uymadan qərəzli addımından əl çəkməli, regionun real mənzərəsini qiymətləndirib sülh üçün çalışmalıdır.