Ақмола облысы Ішкі саясат басқармасының «Қоғамдық даму орталығы» КММ еліміздің қоғамдық өміріне белсенді түрде араласып, өз ұстанымына берік түрлі идеялар ұсынып, оларды іске асыруға атсалысып жүрген жастардың еңбектерін үлгі ету мақсатында «Жастар - жарқын болашақ» тақырыбында жаңа рубриканы іске қосты.​Еліміздің ертеңі, мемлекетіміздің жарқын болашағы білімді де, кәсіби білікті жастардың қолында.​Бүгінгі біздің алғашқы кейіпкеріміз - Көкшетау қаласының №10 Өрт сөндіру бөлімінің қарауыл бастығы Әділет Алтынбекұлы Серік. ​Әділет Алтынбекұлы жас болса да бас болып, алдына қойған игі мақсаттарының арқасында бірқатар жетістіктерге қол жеткізіп отыр.​2015 жылы ҚР ІІМ ТЖК Көкшетау техникалық институтының «Өрт қауіпсіздігі» мамандығына оқуға түсіп, 2019 жылы ҚР ІІМ министрі генерал-лейтенант Е.З.Тұрғымбаевтың қолынан лейтенант шенін алу мүмкіндігіне ие болды.​Әділет Серік «Мәлік Ғабдуллин», «Рақымжан Қошқарбаев», «Қазақстан Өрт сөндірушілер мен құтқарушылар Федерациясына 10 жыл», «Үздік студент-2018», «Үздік студент-2019» төсбелгілерімен марапатталған өз ісінің үздік маманы. Көптеген ғылыми мақалалардың авторы. Көкшетау техникалық институтының 2016-2017 оқу жылының үздік курсанты ретінде танылды.​2017 жылы өткізілген «Жыл студенті» номинациясы бойынша «Jas Aqmola» дәстүрлі облыстық жастар жүлдесінің иегері де атанған. Сондай-ақ, «Akmola Power» облыстық иновациялық жобалар және идеялар байқауының І орын иегері, «Жігіт сұлтаны» атты қалалық байқауының ІІ орын иегері, Қазақстан Республикасы ІІМ жоғары оқу орындарының курсанттарының арасында өткізілген ең үздік «Ғылыми жұмыс» байқауының ІІІ орын иегері атанды.​2018 жылы «Inhelp» мобильдік қосымшасын жасап шығару жобасымен «Startup Bolashak: Менің арманым» Стартап жобалар Ұлттық байқауы бойынша Астана қаласында байқаудың суперфиналисі атанды.​ҚР ІІМ Төтенше жағдайлар комитетінде ұйымдастырылған «Полиглот» сайысында ІІ орынды еншіледі. Көкшетау қаласының Мәдениет және тiлдердi дамыту бөлiмiнiң ұйымдастыруымен өткен «Тілдарын» қалалық олимпиадасында І орын дипломанты атанды. Астана қаласында өткен «Enactus Kazakhstan National Expo-2018» Ұлттық байқауының ІІІ орын иегері атанды.​2019 жылы Ақмола облысы Төтенше жағдайлар департаментінде ұйымдастырылған «Полиглот» сайысының ІІІ орын иегері атанды.Шабуыл сатысымен оқу мұнарасының 4 қабат терезесіне мінуден Ақмола облысының 2019 жылғы чемпионы атанған жас сарбаз.​Бүгінде Әділет Алтынбекұлы Халықаралық қауіпсіздік көрмесіне қатысып, инновациялық идеяларымен еліміздегі Өрт қауіпсіздігі саласын жақсартуға зор үлесін қосып келеді. Өрт және төтенше жағдайларды барлайтын мамандырылған квадрокоптар, қоғамдық ғимараттардан Өрт немесе ТЖ кезінде шығуға арналған қосымша, Көкшетау қаласы №10 Өрт сөндіру бөлімінің шығу ауданындағы өрт гидранттарының электрондық жүйесін, қарауыл бастығына арналған көмекші электрондық сайтын жасап шығаруда.​2019 жылғы маусым айынан бастап Қазақстан Республикасы Ішкі істер министрлігі Төтенше жағдайлар комитеті Ақмола облысының Төтенше жағдайлар департаменті «Өрт сөндіру және авариялық-құтқару жұмыстары қызметі» мемлекеттік мекемесінде жұмыс атқарып келеді.​Жас маман еңбек жолын Астрахан ауданы №19 Өрт сөндіру бөлімінде бастаған болатын. ​Қазіргі таңда Көкшетау қаласы №10 Өрт сөндіру бөлімінде қарауыл бастығы лауазымында қызмет атқарып отыр.​Әділет Серік қазіргі таңда түрлі сипаттағы Өрттер мен апаттарды алдын алып, оны жою жолында үздіксіз еңбек етуде.​Кейіпкеріміздің алға қойған басты мақсаты - болашақта өз Отанына адал қызмет ету, ел дамуына үлесін қосу, азаматтардың қауіпсіздігін қамтамасыз ету.​Жастар табанды еңбек етіп, елімізде болып жатқан оң үрдістерге белсене қатысса жетістікке қол жеткізе алады. Сонымен қатар, жастар бүгінгі қоғамға өз пайдасын тигізіп, алған білімін еліміздің дамып-өркендеуіне жұмсайтын болса, келешегіміздің кемел болары сөзсіз. ​«Адамдық қалыпты биік ұстау - кімге де болса үлкен сын. Адамгершілік деген асыл қасиетті аласартып алмасақ екен. Өмір өзегі осы, азаматтық жолы да осы», - деп Дінмұхамед Ахметұлы Қонаев бабамыз айтқандай ел жастарына үлкен сенім артамыз.​Жарқын болашағына сеніммен қадам басып, ел үмітін ақтай алатын Әділет Серік сынды азаматтарымыз көп болсын!​Кейіпкерімізге мықты денсаулық, ұзақ ғұмыр, берекелі іс, ақ жол тілейміз!