Қазақстандағы жаппай тәртіпсіздіктен қираған мемлекеттік нысандарды қалпына келтіру үшін құрылған Үкіметтік комиссия қазір шығындарды есептеп жатыр. Қаржы министрі Ерұлан Жамаубаев 2024 жылға дейінгі республикалық бюджет бекітіліп қойғандықтан, Ел қазынасынан бір теңге де бөлінбейтінін мәлімдеді. Ал, Үкіметтің баспасөз қызметі аймақтардағы бүлінген әкімдіктерге Үкіметтің резервінен қаражат бөлуіміз мүмкін деп отыр. Бүліктен кейінгі қалпына келтіру жұмыстары мен Омикрон штаммының жаппай таралуы Қазақстан экономикасын одан сайын есеңгіретіп жібермей ме? Кейбір депутаттар неліктен Үкіметтік комиссияға қоғамдық бақылау керек деп отыр? Айбар Төлжанұлы сарапшыларды тыңдап көрген еді.
Бүлінген ғимараттарға ел қазынасынан ақша бөлінбегенімен, Ұлттық қордан алуымыз мүмкін. Бірақ, бас қаржыгер Ерұлан Жамаубаев оны тек Президент шешеді деп отыр. Қазір Үкіметтік комиссия жатпай-тұрмай шығынды есептеуде. Қаржы министрі мемлекеттік нысандарды тау-кен, металлургия мен мұнайдан түсетін экспорттық кедендік баж салығынан түсетін қаржыға жөндейміз деп отыр. Қазір бүлінген мүлкі бар аймақтардың әкімдіктері шығынды шамалап есептеп жатыр. Мысалы, Ақтөбе облысы әкімінің орынбасары шамамен 300 миллион теңге керек деді. Ал, экономист Меруерт Махмұтова Қазақстанда бөлінген ақшаның орнымен жұмсалуын мәслихат, есеп комитеті жіті бақылап отыруы керектігін айтады.
МЕРУЕРТ МАХМҰТОВА, экономист:
- Бізде көбінесе жоба бітіп кеткен соң сосын бірақ бақылайды. Ал оны жоба жүріп жатқанда әр бабын қарап, қайда жұмсалып жатыр, дұрыс жұмсалып жатыр ма, сол жағын тексеру керек! Мұнайдың бағасы қазіргі таңда 80 доллар баррель үшін мөлшері. Сол біздің республикалық кірісті орнына толтырады деп үміттенеміз!
Ал "Бұған дейінгі Үкімет қоғаммен ашық жұмыс істемеді" деген мәжіліс депутаты Ерлан Саиров шығынды есептеумен айналысатын Үкіметтік комиссияға қоғамдық бақылау жасауымыз керек деп отыр.
ЕРЛАН САИРОВ, ҚР Парламенті Мәжілісінің депутаты:
- Мынау өткен Үкіметтің ең негізгі кемшілігі - ол қоғаммен жұмыс істемеген. Ол өзінің мынау экономикалық логикасын, сонымен қатар өзінің жұмысын қоғамға түсіндіре алмаған. Сондықтан көп жағдайда осындай қайғылы жағдайлар болды. Мынау әкімшіліктер осы ең бірінші жаңағы ғимараттардың списогін жасаған кезде, сонымен бірге Үкіметке өздері сұраным жасаған кезде міндетті түрде қоғамның өкілдерінің болғандары дұрыс.
Атамекен кәсіпкерлер палатасы бүліктен бизнеске 100 миллиард теңгеден астам шығын келгенін мәлімдеді. Алайда, нақты есебі енді белгілі болады. Мемлекет басшысы Қасым-Жомарт Тоқаев 1300-ге жуық кәсіпкерлік нысан бүлініп, 100-ден астам сауда орталығы мен банктердің тоналғанын, 500-ге жуық полиция машинасының өртенгенін айтты. Қаңтардағы қырғыннан нақты қанша миллиард шығын келгені Үкіметтік комиссия жұмысын қорытындылағанда белгілі болады!
Айбар Төлжанұлы, Дидар Елеуов
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#АлматыТрагедиясы #бүлік #бюджет