mehemmed.com/teserrufat/boyurt...
‪@budaq‬ ‪@teserrufat‬
Salam, əziz izləyicilər. Giləmeyvələr içərisində böyürtkənin də özünəməxsus yeri vardır. Təbiətdə tikanlı şəkildə yabanı böyürtkənə çox rast gəlinir. Elə tikanlı olmasına görə də onu yığmaq bir qədər çətinlik yaradır. Lakin böyürtkənin tikansız və eləcə də iri giləmeyvəli növləri də vardır ki, onları həyətlərdə becərməyinə dəyər. Bu cür növlər əsasən xaricdən gəldiyinə görə ölkəmizdə az yayılmışdır və ancaq həyətlərdə becərilir. Ona görə də bu cür növlərin çoxaldılmasına ehtiyac duyulur. Əgər sizdə və ya tanışınızda bu cür növlərdən varsa, onu asanlıqla artıra bilərsiniz.
Ümumiyyətlə, bir çox bitkilər vegetativ yolla da çoxaldıla bilir, toxumla da. Təəssüflər olsun ki, yaşadığımız dövrdə hibrid bətkilər o qədər baş alıb ki, onların toxumla çoxaldılması da mümkün deyildir. Daha doğrusu, belə bitkiləri toxumla artırdıqda, fərqli bitki əldə etmiş oluruq. Vegetativ yolla artırma zamanı isə aldığımız yeni bitki tamamilə ana bitkinin təkrarı olur.
Elə bu yazımızda da böyürtkən bitkisinin vegetativ yolla artırılmasının asan və etibarlı üsullarından birini sizə təqdim edirik. Aşağıdakı videoda qaydasını və nümunələri sizinlə paylaşırıq. Bu iş üçün sizə lazımdır:
►Böyürtkən kolu
►Kiçik plastik qab (birdəfəlik stəkan və sair)
►Münbit və ya adi torpaq
►Kiçik məftil parçası (olmasa da olar)
Əvvəlcə plastik qabın alt hissəsini deşirik ki, suladığımız zaman suyun artıq hissəsi axıb gedə bilsin. Həmçinin, qabın yuxarı hissəsindən kiçik ölçüdə çərtə bilərik ki, kolu həmin hissədən keçirə bilək. Videoya baxdıqda, nəyi nəzərdə tutduğumuzu anlayacaqsınız.
İşin icrası isə çox asandır. Böyürtkən kolunun uc və ya ortasından hər hansı bir hissəsini plastik qaba tökdüyümüz torpağa toxunduraraq V şəkilli məftil ilə torpağa bərkidirik. Torpağın nəm olmasına nəzarət edirik. Qurumaması üçün vaxtaşırı sulayırıq. Plastik qabda olan torpaq isti vaxtlarda tez qızdığına görə yaxşı olar ki, onu günəş şüalarından qorumaq üçün qəzet və ya hər hansı bir kağız parçası ilə və ya digər mulça materialları ilə bükək. Yaxud da yeri qab dərinlikdə qazaraq həmin qabı qazdığımız yerə qoyaq. Videoda bunlara da aydınlıq gətirmişik.
Plastik qabımızdakı torpağı rütubətli saxlasaq, təxminən bir ay ərzində köklənmə yetərincə baş tutacaq və biz qabda kök atan yeni kolumuzu ana koldan ayırıb müstəqil bitki kimi başqa yerdə əkə bilərik. Əkmək üçün vaxtımız olmasa, həmin qabda bir qədər də saxlaya bilərik. Amma çox saxlamaq lazım deyil ki, yeni kolun kökünə qab balacalıq etməsin.
Əgər sualınız, irad və təklifiniz varsa, burda və ya youtube-da qeyd edə bilərsiniz. Həmçinin, böyürtkənin tikansız növündən və tikanlı-iri giləmeyvəli (tezyetişən) növlərindən əldə etmək istəsəniz, bizə müraciət edə bilərsiniz. Əlaqə vasitələrmiz: mehemmed.com/ozum/elaqe-vasitesi
#Böyürtkən #Blackberry #Ежевика #Çoxaltma #Giləmeyvə #Aqronom #Ягода #Выращивание #Lağanda