Үміт үзілді. Жамбыл облысындағы жойқын жарылыстан соң із-түссіз жоғалған әскери қызметкер Бауыржан Дәуітбаевтың мәйіті жер қойнына тапсырылды. Әскерилердің айтуынша, сүйек қалдықтары бөлімшенің техникалық аумағынан табылған. Бірақ мәйіттің Дәуітбаевқа тиесілі екенін анықтау үшін екі айға жуық уақыт кетіпті. Сөйтіп, сараптама қорытындысына сәйкес сүйектердің 99 пайыз марқұмдікі екені расталған. Алайда бір жыл үш айдан бері үмітін үзбей, сабылып тау-тасты кезіп, сағынып күткен туыстары Бауыржанды ақтық сапарға шығарып салса да бақилық болғанына сене алмай отыр.
Күздің соңғы күні - бір жыл үш айдан бері «әне-міне есіктен кіріп келердей көрінген Бауыржан Дәуітбаевтың» туыстары мен бір кісідей жұмылып жабыла іздеген жақындарына суыт хабар жеткізді. Көңілге медет сыйлаған соңғы үміт те үзілді. Міне, екі ай бұрын әскери бөлімшеден табылған сүйек қалдықтары із-түссіз жоғалған әскери қызметкер Дәуітбаевқа тиесілі екені анықталып отыр. Ал қаралы хабарды естіген ел қара жамылған шаңыраққа келіп, көңіл айтып жатыр. Бірақ қабырғасы қақырап, қайғыдан көкірегі қарс айырылған әкесі де, «ол тірісінен» жаңылмайтын жақындары да «енді жоқ дегенге» сене алмаймыз деп отыр.
ТАЛҒАТ ДӘУІТБАЕВ, Б.Дәуітбаевтың әкесі:
- Жүрек әлі де сенбейді. Жүрген шығар деймін бір жерде. Әскери тергеу басқармадан Алматыдан сараптама қорытындысы шықты, 99 пайыз сіздің балаңыз болып шықты дейді.
28-349 әскери бөлімінде өрт сөндіруші болып қызмет еткен кіші сержантты іздеу жұмыстары 2021 жылдың 26 тамызынан бері жүргізіліп жатты. Бірақ нәтиже болмады. Ал екі ай бұрын әскери қоймадан Бауыржанның дене мүшелері табылыпты. Мамандар мәйітті үйілген топырақ астынан қазып алған екен.
ЕРКІН ӘБСАДЫҚОВ, 28349 әскери бөлім командирі:
- Шамамен маштабты білетін шығарсыздар. Топырақ шашылады. Сол топырақтың астынан, қатты тереңдіктен табылды. Нақты қандай дене мүшесі екенін айта аламыз ба? - 60 пайызы деп айттым ғой.
Бүгін марқұм Бауыржан Дәуітбаевтың денесі өзі қызмет еткен әскери бөлім маңындағы бейітке қойылып отыр. Ардақты ұлын ақтық сапарға шығарып салуға келген кісі қарасы қалың.
Бір ай бұрын сот Бауыржан Дәуітбаевты қаза тапқандар қатарына қосқан. Марқұмның артында бес баласы мен әйелі қалып отыр. Енді қаралы отбасыға өтемақы беру жайы қарастырылып жатыр. Көмек көлемі шамамен 35 миллион теңге. Айта кетейік, Жамбыл облысындағы жойқын жарылыстар кезінде 98 адам жарақат алған. Ал қаза тапқандар саны 18 болып отыр. Бірақ бейбіт күнде осынша адамның өмірін жалмаған апаттың нақты себебі әлі айтылған жоқ.
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал