Yaxın vaxtlarda Balaxanı Sənaye Parkında 6 rezident istehsala başlayacaq. Həmin müəssisələr polietilen və polipropilen tullantıların təkrar emalı, yapışqan lent, bioyanacaq üçün xammal, aktivləşdirilmiş kömür, gübrə və yem, plastik tor istehsalı sahəsində fəaliyyət göstərəcək. Bu barədə bir qrup ekspert və media nümayəndəsinin Balaxanı sənaye parkı ilə tanışlığı zamanı məlumat verilib. Bildirilib ki, park istehsal imkanlarını genişləndirir.
Burdakı istehsal müəssisələri ilə tanış olan iqtisadçı ekspertlər bildirirlər ki, Azərbaycanda son illər sənayeləşmə prosesinin sürətlənməsində bu cür xüsusi zonalar mühüm rol oynayır. Burda istehsal olunan yerli məhsullar idxalın azaldılması ilə yanaşı, yeni iş yerlərinin açılmasına ciddi təsir edəcək. Eyni zamanda, “Made in Azərbaycan” brendi altında məhsulların istehsalına da şərait yaradılacaq.
Balaxanı Sənaye Parkının yaradılmasında başlıca hədəf təkrar istehsal sahəsində maraqlı olan potensial sahibkarlar və investorlar üçün əlverişli şərait yaratmaqdır. Park ərazisində mexaniki emal və istehsal qurğuları dövlət dəstəyi ilə quraşdırılır. Bu da sahibkarların kapital qoyuluşunu azaldır, onların daha səmərəli fəaliyyətinə imkan verir.
Sənaye Parkının Balaxanı poliqonuna və tullantıların yandırılması zavoduna, o cümlədən əsas nəqliyyat qovşağına yaxınlığı həm xammal və enerji təchizatını, həm də məhsulun bazara çıxarılmasını asanlaşdırır. İndi sənaye parkda 11 rezident fəaliyyət göstərir. İqtisadçılar “Təmiz Şəhər” Açıq Səhmdar Cəmiyyətinin Böyük Şor gölündə apardığı işlərlə də tanış olublar. Cəmiyyərin sədri Etibar Abbasov bildirib ki, Böyükşor gölünün bərpası layihəsinin 2-ci mərhələsinin layihələndirmə işlərinin iyul ayında yekunlaşması gözlənilir. Layihənin birinci mərhələsi çərçivəsində 300 hektar ərazi təmizlənib. 15 hektara yaxın ərazidə Böyükşor Parkı və Bulvarı salınaraq Bakı sakinlərinin istifadəsinə verilib.