Ұстаз болу - жүректің батырлығы,Ұстаз болу - сезімнің ақындығы,Ұстаз болу - мінездің күн шуағы, Азбайтұғын адамның алтындығы - деп ақын Ғафу Қайырбеков ұстаз туралы жырлап, тәрбиенің басты арқауы ұстаз екенін дәлелдеп кеткен болатын. Шыныменде ұстаз сөзінің бойында қаншама мән-мағына жатыр. Қай мамандық иесі болсада, алдымен ұстаздың алдынан өтіп, оның тәлім-тәрбиесін алары хақ. «Ұстаз» сөзінің астарында мыңдаған білім мен ғылым, махаббат пен сүйіспеншіліктің құдыреті жатыр. Қаншама ғасыр өтсе де ұстаздың аты және «ұстаз» деген ұғымның атауы өз мағынасын жойған емес. Өйткені, қай дәуір болмасын қоғамға, адам тәрбиелеу барысында ұстаздың еңбегі ерекше. Қазіргі таңда көптеген оқушылар мен жастардың қызығушылығы информатика пәніне арта түсуде. Солардың бірі - жас маман Көкшетау қаласы №19 жалпы орта білім беретін мектептің Информатика пәнінің мұғалімі Ақнұр Дінмұқаш.Ақнұр ұстаздық жолын ең алғаш рет осы мектептен бастаған. Дәріс беру барысында оқушыларға сабақ беру қиынға соқпағанын тілге тиек етті. Оның сыры оқушылармен жас айырмашылығының қатты үлкен болмағандығы. Технология, оның ішінде Информатика пәні XII ғасырда өте қарқынды дамып келеді. Жас маман Ақнұр Дінмұқаш әртүрлі платформаларды қолдану арқылы сабақты қызықты әрі тиімді етіп өткізеді. Бұл мектепте оқушыларға арналған арнайы Лаборатория кабинеті де бар. Онда түрлі құрал-жабдықтар, компьютерлермен сабаққа керекті заттар жетіп артылады. «Әрбір өтілетін сабақтың өзіне тән стилі болады. Өту ережесіде, айтылатын, түсіндірілетін бағамдары да әртүрлі болмақ. Әр сабағымызды қызықты әрі пайдалы қылып өткізу үшін берілген барлық мүмкіндікті пайдаланып, лаборатория кабинетінде орналасқан жабдықтарды сабаққа байланысты қолданамыз.Осылай біздің сабағымыз қызықты әрі мазмұнды өтеді» -, дейді кейіпкер.
Өз өмірін ұстаздықпен байланыстырып, оқушылармен жұмыс жасағанды жаны сүйетін Ақнұр Дінмұқаш 10 жылға жуық мектеп қабырғасында мұғалім болып қызмет етіп жүр. Жаңа технологиялардың мүмкіндігін пайдалана отырып, түрлі жабдықтармен мүсіндер жасап, балабақшаларға сыйға таратады.
Кейіпкеріміз Ақнұр Жәрдемқызының ұстаздық қызметіне табыс, отбасына береке тілейміз!
Шәкірттеріңіз саналы да білімді болып, еліміздің дамып-өркендеуіне өз үлестерін қосуларына тілектеспіз.