کاتێک لە ئەندرویزج ویلتزینسکی- م پرسی "ئێوە بۆ ئەو شۆڕشەتان بەرپاکرد؟"، رووی لێ گرژ کردم. بە دەنگێک کە پڕ بوو لە نیگەرانی گوتی "تۆ نازانی وارشۆ لەو رۆژگارەدا چەندە گیرۆدەبوو بەدەست نازییەکانەوە! خەڵک لە ژێردەستییەکی پڕووکێنەردا بوون". ئەو یەکێک بوو لە راپەڕیوەکان و زۆرتر لەوەش ، پێویستی راپەڕین وایکردبوو، بێ لەبەرچاوگرتنی تەمەنە کەمەکەی ، ببێتە فەرماندەی بەشێک لە شۆڕشگێڕەکان.
ئێستا زۆر ئەستەمە لە وارشۆ بڕوا بەوە بهێنی، ئەو شارە جوان و پڕ لە جووڵە و کارە، رۆژگارێک شەڕ و بۆردوومانی بێبەزییەکان چۆن کردبوویانە کەلاوەیەکی گەورە کە تەنیا مرۆڤە بەهێزەکان دەیانتوانی گرەو لەسەر هەستانەوەی بکەن. ئەویش بەهۆی ئەوەی خەڵکەکە دیلێتی نازییەکانیان رەتکردوە و بڕیاریاندا لە دژیان راپەڕن، ئەگەرچی دوای زۆرتر لە 70 ساڵ هێشتا باجە قورسەکەی مشتومڕی لەسەرە.
هەندێک لەو فڕۆکە و تانکانەی شارەکەیان وێرانکرد ، هێشتا لەنێو مۆزەخانەی نیشتمانیی وارشۆ پارێزراون. دیمەنەکان پێچەوانە بوونەتەوە، ئێستا وارشۆ هەستاوەتەوە و شارێکی جوانە، بەڵام فڕۆکە و تانکەکان ژەنگی مێژوو لێیداون.
لەم بەڵگەفیلمەدا، دووان لەو فەرماندانە قسە دەکەن کە بەشداریی راپەڕینەکەیان کردووە و هەموو دیمەنەکانیان لە پێش چاو ماوە. ئەو راپەڕینەی هەزاران کەس بە مردنی خۆیان لە مێژوودا نووسییانەوە و ئازادییان لە وێرانەیەکدا بەدەستهێنا. ‌
پرۆدیوسەر: نەوزاد مەحموود
بەرهەمی ساڵی 2017