Рет қаралды 52
1997-12-26
شاعیر و نووسەر، سولەیمان چیرە-هێرش میوانی بەرنامەی "دیداری عازیزان"
لە تەلەڤیزیۆنی مەد تێڤێ.شێعری "بزەی خوێن" دەخوێنێتەوە کە بۆ یادی شەهید
عەزیزی یۆسفی دایناوە.
«بزەی خوێن»
عیشقە تەنیا مەکتەبم، هیچ دەرسێ نازانم ئەمن
ســـەد کەڕەت ڕەت ببمەوە ناڵێم پەشیمانم ئەمن
عیشقی شیرین وای لە من کرد ببمە فەرهادی زەمان
کــــێو لەبن بێنم بە دەنگـــــــی تیشـــەلێدانم ئەمن
تا پەریزادی ئەڤین دیل بێ بەدەست دێوی دزێو
چۆن هەدادانم دەبێ گـــەر مەردی مەیدانم ئەمن
گیان لەسەر دەست تێدەکۆشم چیم بەسەر دێ دوایە، چش
" تــــۆزی بانـــانم لـــەپڕ، یا خـــانی خانـــانم ئەمـن* "
دێوی شەو سەدها چەلی کوشتوم لە جێژوانێ کەچی
" لای بەیـــانان دێ دەبیــنێ هەر هــەزارانم ئەمن** "
هەم تریفەم هەم تروسکەم هەم بروسکەم هەم شەماڵ
پەلکـــەزێڕینەی گـــەش و ڕەنگیـــنی ئاسمـانم ئەمن
وەرزی پاییزان گزینگم هەڵدەوێزنم زوڵفی شەو
لای بەهـارانیش گوڵاڵـەی ئاڵی کوێستانم ئەمن
ئەو دەمەی دڵدارەکان بەدزی دەچن بۆ جێژوان
دژ بە شــۆفارانی شــەو پارێـــزەری وانم ئەمن
دێم دەنەخشێــنم بە خوێـــنم ڕووی بزرکـاوی زەوی
نەختە نەختە، نوختە نوختە، ئەهدو پەیمانم ئەمن
گەر بزەی خوێنم ببینن قەت منو ناچێ لەبیر
جەوهەری مانی گەل و بوژێنەری ژیانم ئەمن
دێرشکێی بادینان ١٣٦٣