昨晚姜濤喺叱咤頒獎禮冧庄再奪《我最喜愛的男歌手》及《我最喜愛的歌曲》大獎，當佢演繹紀念亡友嘅《Dear My Friend 》時，更因思念至爆喊，心傷得尾聲無法唱下去。頒獎禮後，心情稍得平伏返嘅姜濤，問到當刻感受，佢覺得當眾喊好失禮︰「可能年尾，就會想起以前一啲朋友，所以覺得唔係幾好意思，睇返好似好樣衰。」思念故友嗰份真性情，令人動容就真。
再次成為大贏家，姜濤保持謙卑︰「希望成個香港樂壇，繼續一齊做好音樂，我相信呢個目標遲早達成，所以對在座樂壇每一位都好有信心。」問佢再冧庄係咪始料不及，佢話︰「係！」此時隊長Lokman提醒︰「成句講。」姜濤好聽話︰「我覺得自己仍有好多不足嘅地方，所以每次攞獎，都係一個好大嘅驚喜。雖然去年有攞呢個獎，但每年都係一個新嘅開始，希望以後用好嘅作品，證明畀大家睇，呢個獎係值得攞。」
至於尋晚林海峰宣布《我最喜愛的男歌手》時，狂玩幾位MIRROR成員，仲搞到Anson Lo企埋起身，差啲食乍糊，真係心血少啲都頂唔順。事後Anson Lo都話，聽到林海峰讀自己個名，個心真係離一離。「真係嚇死人，我諗每個人聽到自己個名都會呆咗，畀唔到反應，我自己都猶豫緊，係咪final confirm，我覺得呢件事係搞笑。」在旁嘅Edan，同樣話畀林海峰嚇死。
Edan攞生力軍銀獎，輸咗畀對手張天賦， Edan覺得對方實至名歸。「今年已經好滿足，當初冇諗過攞到，咁而家攞咗銀獎，已經好開心好滿足，MC係實至名歸。」
尋晚有份攞歌曲獎嘅Jer，焦點卻落在女友Kelly喺除夕放嘅一個post，疑借酒消愁寫下︰「我知道真相咪得囉！」結果一出，累得Jer被追問，佢話︰「其實有好多嘢係大家嘅估計，你未必知當事人post呢張相嘅意思係乜嘢，有好多嘢都係猜測，冇謂再咁多評論。」凡被追問感情事，MIRROR成員總會出手解圍，Edan︰「兩個人嘅事，由兩個解決。」副隊長AK，亦出手打斷話題︰「同埋今晚頒獎禮咁開心，我哋應聚焦返喺呢件事上，新年快樂！」
講到新年快樂，當然要講埋新年願望，Tiger今年目標係想學電單車，「因花姐話考電單車有贊助，咁我希望真係有，因為我畀埋身份證號碼佢，希望呢件事係真。」原來呢個都係AK願望︰「有另一同伴就係我，因為今年其中一個願望都係好想學電單車，多謝你問呢個問題，呢個訪問出咗街，花姐就冇得唔畀。」
喺叱咤頒獎禮，MIRROR及成員單飛成績，合共奪得8個獎項，對於呢張成績表，正副隊長都好滿意，Lokman︰「其實好開心，雖然我哋成日話唔係衝住個獎去做，但去到最後大家有好成績，真正有啲認可，係由心有種溫暖喺度。」
AK補充︰「努力啦，按我哋慣例，每集升啲，希望可以衝到去至尊歌曲，好多謝大會今次畀我哋嘅肯定，令我哋上升多一級。」
#mirror #姜濤 #叱咤樂壇頒獎禮 #娛壹
----------------------------------------------------------
即刻跟住Follow 晒我哋Channel：
FB： as1hk.entertainment
IG： / as1.entertainment
YT： / @as1.entertainment