จิตฺต สุคติ มหาวิทยาลัยมหาสารคม
ขับร้อง - อาฟ้งศุภกิจ , อังกอร์ จิราวัลย์
คำร้อง - อัครวิทย์ ทองใบ
เรียบเรียงดนตรี - คีตะอีสาน
***********เนื้อร้อง*********************
ศิริสุมังคัลมื้อ ข้ายอมือขึ้นกวมเกศ สิทธิเดชพระตรัยแก้ว
ผู้เถิงแล้วบั้นนิรพาน(ผู้เลิงแล้วนีรพาน)
ทศญาณเลิศล้ำ ในพระธรรมแจ้งส่อง จั่งกะบองส่องแจ้ง
แยงไต้ได้ฮุ่งเฮือง(แยงไต้ได้ส่องเฮือง)
สาธุการบ่อนเบื้อง นบเถิงคุณอ้อป่อง ปะเลียนสองมื้อน้อย
แล้วแต้มต้อยควมริจนา(แต่งสร้อยความริจนา)
ยินเสียงฮว่านฮว่านฟ้า มื้อพระศุกร์สิบห้าค่ำ
ขีดควมลำลงเกี้ย อย่าเสียถิ่มหมึกปากกา(อย่าเสียถิ่มควมผญา)
สาธุเด้อตนข้า ผู้ลิขิตาอย่ากรรมไล่ เวรอย่าไลจ่องน้าว
เป็นบาปเท่าทั่วซีวัง(ตราบเท่าซั่วซีวัง)
กับอีกทังผู้แปงสร้าง อันนาฏการและฟ้อนแอ่น
ให้เถิงแก่นกาพย์เค้า กกเหง้าปูมผญา (ควมเค้าเล่าผญา)
บ่ว่าเร็วฤาซ้า มะระณาต้องมาไล่ ไผผู้หลีกม้มได้
ในภูมิพื้นกะบ่มี (อยู่ในพื้นหากบ่มี)
ย้อนว่ามะตะนี้ มีพร้อมซุบาดย่าง ความตายห้อยจ่องข้าง
สิวางไว้กะบ่เป็น (ปงวางไว้ไผเฮ็ดเป็น)
วาระกาล สิ้นสังขาร ละสังขารา
ฮูปเวทนา ละสิ้นสูญสลาย
มรณา ล่วงลาลับ ดับขันธ์มลาย
สละสลาย เถิ่งที่มรณะกรรม
ขวัญห่างคีง ฮ้างห่างมิ่ง ลาทิ้งซุอัน
ทิ้งสรรพสัน เลียนล้อม พร้อมพร่ำ
มตะสูญ สละสลายตามวาระกรรม
สู่แดนธรรม ที่ล้ำกว่าสรรพสิ่ง
เถิงแก่กรรม ละธรรมขันธ์ธาตุ
คีงคาบอันปราศ วิญญาณเนานิ่ง
ขวัญคีงเค้า เล่าลาคาบ เหินฮ้างหิ่งมิ่ง
บ่เตี้ยงตีง เป็นควมจริงอันธรรมดา
สุคติ ภพภูมินี้ เวียนวัฏวน
ธรรมกุศล สูดมนต์ ภาวนา
ทวยเทพพร้อม ล้วนเลียนล้อม แห่ฮ้อมโฮมมา
ฮับขันธ์วิญญา สถิตฟ้าคืนย้ายฝ่ายพรหม
ฮับขันธ์วิญญา สถิตคืนฟ้า ยวงย้ายฝ่ายพรหม
(3)
เฟือยละฟ้อน เฟือยละฟ้อน อ่อนละแอ่น
กวยละแก่ง กวยละแก่ง ก้านมาลา
เทพไท้ไทละบา ลาลีลา ลาลีลา ลอยละล่อง
ตุริเยศไทขับจับระบำรำร้อง จับระบำรำร้อง กล่อมกิ่งกลอง ซอซุงฆ้องสับสาย
กวยแพนแอ๋ละแอ่นหยับย้าย
วาดแขนออละแอ่นโยงย้าย
เบี้ยงขัวเบี้ยงซ้ายยัวระย้ายลีลา
สลับแขนขาลงลีลายัวระย้าย
เนืองนีนัน ขับประเลง เค่งสาย
เลี่ยนละใหล เลี่ยนละใหล ลีละล่าย
หมู่มวลทวยเทพท่อนไท้ เลียนลีล่าย ลาลีล่ายย้ายละย่าง
ผีแถนไท้ไทเทิง ล้วนเลิงสะอาดสอางค์ สะโอดสะองสำอางค์
ตุริยางค์ ขับนนตรีสีซอ
อ้อนละแอ อ้อนละแอ อีละออ
อ้อนละออ อ้อนละออ อีละแอ
ซอซุงแถมแถหมู่ไท้ไทระบำ
นวยนายร่ายรำไทระบำทำท่า
โยติกา โยติกา กาพย์กลอน
บั้นละบ่อน บั้นละบ่อน ลงลา
ผู้ใดซื่นใสศรัทธา โมทนา โมทนากุศล
อย่าได้วกเวียนว่าย เกิดตายในวัฏวน
วัฏวกเวียนวน บันดาลดลเถิงที่นีระพาน
ม้มบ่วงห้วงโอฆะสงสาร
สำเริงล้วนทั่วถ้วนสุขสราญ
เถิงศาสน์พระศรีอาริย์ศิระกรานสวัสดี
ทวยข้าเองชุลีอภิวาทประสาทพร