Рет қаралды 60,076
Salyan rayonunda paxlalılar fəsiləsinə aid müxtəlif növ yetişdirilən ağaclar var ki, onlar şəhərin bəzəyinə çevrilib. Bunlardan biri də keçibuynuzu ağacıdır. Bu ağacın çox böyük müalicəvi əhəmiyyəti də var.
Payız fəslində yetişən keçibuynuzu ağacı Salyanda daha çox küçələrin kənarında əkilib. Ötən əsrin əvvəllərində şəhərin mərkəzində qrunt suları çox olub. Elə qrunt sularının qarşısını almaq məqsədi ilə rayonda əkilən ağaclardan biri də keçibuynuzu ağacı olub. Müxtəlif növdə olan keçibuynuzundan biri isə ötən əsrin 20-ci illərin ortalarında Amerikadan Salyana gətirilib. Hündürlüyü 5 metrdən 15 metrə qədər olan ağac payız aylarında 50-100 kiloqram arasında bar gətirir. Paxlalılar fəsiləsinə aid olan keçibuynuzu ağacı el arasında “bal ağacı” adlanır. Bir vaxtlar yerli sakinlər bu bitkidən daha çox istifadə ediblər.
Sakin Fəxrəddin Abdullayev: “Uşaq vaxtı kəsirdik onu. Onun içərisində bal var idi. Yeyirdik onu. İndi artıq yaşlaşmışam, çay kimi dəmliyib içirəm.”
Kənd sakinləri deyir ki, II Dünya müharibəsi illərində Kür çayının balıqları ilə yanaşı, həm də bu ağacların meyvələri yerli sakinləri aclıqdan xilas edib.
Sakin Nadir Zeynalov: “Bankalara yığırdıq onu. Bıçaqla çörəyin üstünə yaxırdıq ondan, qəşəng yeyirdik.”
Mütəxəssislərin fikrincə, keçibuynuzunun çox böyük müalicəvi əhəmiyyəti var. Belə ki, keçibuynuzunun meyvələrindən astma, allergiya, xərçəng və digər xəstəliklərə qarşı istifadə olunur. Həmçinin qaraciyəri toksinlərdən təmizləyir, uşaq iflicinin qarşısını alır, ishal və qəbizliyi aradan qaldırır. Onun meyvəsindən müxtəlif dərman preparatları hazırlanır. Həmçinin süd artımı üçün keçibuynuzunun meyvələri iribuynuzlu heyvanlara da verilir. Keçibuynuzu əsasən Aralıq dənizi sahillərində, Misir, Türkiyə, Kipr, Yunanıstan, İspaniya, Portuqaliya, Siciliya adası və Maltada, eləcə də ABŞ-ın Kaliforniya ştatında bitir.