Дьоҥҥо “Тиэргэн ыһыаҕын маннык ыытыахха сөп” диэн сырдатар соруктаах, бэс ыйын 16 күнүгэр Сыромятниковтар дьиэ кэргэн “маастар-кылаас” быһыытынан тиэргэннэригэр ыһыах ыстылар.
Ону видеоҕа устан, таҥан, ыһыах иннинээҕи күн социальнай ситиминэн тарҕатыахтара. Дьон көрөн үтүктэн, тэлгэһэлэригэр ыһыах ыһалларыгар анаан. Бэрт кылгас кэмҥэ тэриммит буолан, ирдэниллэрин курдук, мал-сал, таҥас-сап, сиэр-туом, биллэн турар, кыаллыбата. Уонна ол Үс Хатыҥҥа ыытыллар ыһыах курдук улахан тэрээһин буолбатах буоллаҕа дии. Дьиэ кэргэн иһинэн. Ол иһин “Тиэргэн ыһыаҕа” сэмэйдик, ол эрээри ис сүрэхтэн истиҥник ыытылынна.
“Тиэргэн ыһыаҕын” алгыһын аал уотун оттон, дьиэлээх хаһаайын Иван Сыромятников оҥордо. Ыһыах ыһыллар күнүгэр аймах-билэ дьонноро Сыромятниковтары өйөөн, бары сахалыы таҥнан, алаадьылаах кымыс тутан, бэйэлэрин эҕэрдэлэрин батсаабынан ыыппыттар. Оттон аҕаларын улахан убайа Дмитрий Собакин бэйэтин төрөөбүт алааһыгар, Чурапчы Уһун Күөлүгэр уотун аһатан, аймахтарын алҕаан устан ыыппыта, олох ураты тыыны биэрдэ. Бу, кырдьык да, өбүгэ ситимэ. Онон Собакиннар, Макаровтар, Тоскиннар, Дьячковскайдар, Сыромятниковтар дьиэ кэргэттэрэ Чурапчыга, Сыырдаахха, Хатыҥ Үрэххэ, Дьокуускайга хас биирдиилэрэ бэйэлэрин тиэргэннэригэр ыһыах ыһан, тэйиччиттэн (онлайн) эҕэрдэлэстилэр.
Онон “Тиэргэн ыһыаҕын“ ыытыы видеоматырыйаалын барытын түмэн, таҥан, Сардаана Сыромятникова сотору бэйэтин “YuoTube” ханаалыгар таһаарыаҕа. Оттон “Тиэргэн ыһыаҕын” торумун culture-Yakutia.com саайтка угуохпут. Онно киирэн көрүөххүтүн сөп.
#ыһыах
#культураякутии
#праздниклета
#ысыахонлайн
#дьиэкэргэн
#алгыс
#оһуохай
#олоххайдахбаарынан
#аймахыһыа5а