Кандыг-даа чоннуң улуг байырлалдарында хамыктын мурнунда ук чоннуң бурунгу культуразы, үе-дүптен сагып, хумагалап чорууру чаңчыл-ёзулалдары, национал чоргааралы илерээр. Шагаа болза тыва чоннуң эң-не бедик сүзүглелдиг национал байырлалы; эрги чылды үдеп, чаа чылды уткуур ыдыктыг ёзулалы. Тывага каразымаар тоолай чылы февраль айның 21-де үнер.
Улустун аас чогаалының бир хевири - чечен-мергеннер чугаазы. Шаандан тура чоннуң аразында кончуг чечен-мерген, чугаа-сооттуг сагынгыр-тывынгыр улус чораан. Ындыг улусту "эринниг чуве эннежип болбаан" , "чаактыгга чаргызын алыспас" деп чугаалаар. Чечен-мергеннер чугаазы уругларны дүрген бодандырарынга, чугаа-домаан сайзырадырынга ужур-дузалыг.
Кел чыдар Шагаа байырлалы таварыштыр "Тыва" ансамблиниң аныяк хөөмейжилери чечен-мерген чугаазын силерге бараалгап тур!