Рет қаралды 4,040
Елімізде эпидемиологиялық ахуал күннен күнге ушығып барады. Өткен тәуліктің өзінде Қазақстанда 10 мың 418 адам коронавирус инфекциясын жұқтырған. Індеттің өршуіне байланысты Нұр-Сұлтан, Алматы, Шымкент қалалары мен 8 облыс қызыл аймаққа кірді. Соған сәйкес кей өңірлерде жаңа қаулы қабылданып, карантиндік шектеулер күшейтіліп жатыр. Ал қайта-қайта ушыққан індет пен елдегі ахуалға байланысты енгізілген төтенше жағдайдан әбден шығынға батқан кәсіпкерлер ендігі күніміз не болады деп алаңдап отыр.
Сан-эпидемиолог мамандардың соңғы алған сынамаларының сегізінен Омикрон штаммы анықталған. Оның 7-еуі Алматы қаласынан шыққан. Сондай-ақ, соңғы тәулікте Алматыда мыңнан аса тұрғын қауіпті індетке шалдыққан. Олардың 71 пайызы дельта штамын жұқтырғандар. Соған байланысты бүгін қаланың бас санитар дәрігері жаңа қаулы қабылдады. Жаңадан енгізілген карантиндік шектеулерге байланысты мегаполисте ойын-сауық орындары, театр, түнгі клуб, концерт залдарының қызметіне түбегейлі тыйым салынды. Қоғамдық тамақтану орындарына келушілер саны шектеліп, бір үстелге төрт адамнан артық отыруға рұқсат жоқ. Мұндай талап кәсіпкерлерді тағы да тығырыққа тіреді. Әсіресе індет басталғалы шектеулерден арылмай келеміз деген қоғамдық тамақтану орындарының қожайындары, табыстан қағылғандарын айтады. Пандемия, одан қалды жаппай тәртіпсіздік кезінде жарияланған төтенше жағдай кәсібімізді құрдымға кетіретін болды деп қапалы.
ЗУЛЬФИЯ МУРАКИМҚЫЗЫ, дәмхана иесі:
- Бүлікшілер біраз кәсіпкердің нысандарын қиратты, тонады, өртеп кетті. Естіп жатырмын. Шығынға шаш етектен батып жатырмыз. Төтенше жағдай деп жұмыс та істей алмадық. Енді міне жаңа қаулы шығып, келушіер санын шектеп жатыр. Бізді әбден тығырыққа тіреп қойды. Күйзеліске түсіп кеттік қазір.
Жаңа қаулыға сәйкес спорттық сауықтыру орындарына, моншаларға "Ашық" қосымшасының жасыл түсі арқылы ғана кіруге болады. Сонымен қоса, мемлекеттік мекемелер мен ұлттық компаниялар, кәсіпорындардың әкімшілік қызметкерлерінің 70 пайызы қашықтан жұмыс істейді.
ҚАРЛЫҒАШ ӘБДІЖАББАРОВА, Алматы қаласының бас мемлекеттік санитар дәрігері:
- "Омикрон" штаммы аса қауіпті. Вирустың бұл түрі адамдардың бұрыннан келе жатқан ауруын асқындырып жібереді. Алматыда Омикрон анықталған 7 адамның жас шамалары әр түрлі. 2 азамат шетелден келген, қалғаны жергілікті тұрғындар.
Қауіпті індет еліміздің барлық өңірінде бірдей өршіп барады. Соңғы тәулікте 10 мыңнан аса тұрғыннан коронавирус инфекциясы анықталған. Мегаполистерден бөлек 8 өңір қызыл аймаққа енгізілді. Осыған орай бірнеше облыста жаңа қаулылар шығарылып, карантиндік шектеу күшейтіліп жатыр. Бірқатар өңірде оқушылар да үйлерінен оқитын болады. Ал мамандар коронавирус қатты толқыны наурыз айында болады деп болжап отыр.
Абай Нұржанұлы, Рахымжан Ысқақов
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Атамекен #кәсіп #шектеулер #бизнес