Рет қаралды 428,034
Кешегі түн - Алматыда расында да шұғыл түрде төтенше жағдай жариялайтындай мазасыз өтті. Жаңаөзендіктерді қолдау мақсатында басталған бейбіт шеру бір-ақ сәтте айқай-шуға, белгісіз адамдар тобының көліктерді өртеп, полицияға қарсылық білдіруіне ұласты. Алматы әкімдігі ғимаратын басып кіргендер болды. Ал, Республика алаңы көк түтінге көміліп, митингке қатысушылар «газға тұншықтық» деп алаңды тастай қашты. Біздің тілшілер де алаңдағы наразылықтың басынан аяғына дейін жүріп, репортаж жасады.
Біз алаңға келгенде елдің қарасы тым аз еді. Сәтбаев көшесінің Назарбаев даңғылымен қиылысқан тұсында әскери көліктер мен полиция қызметкерлері еш әрекетсіз тұрған. Ал, Назарбаев даңғылы мен Желтоқсан көшесінің аралығындағы қала әкімдігінің ғимараты орналасқан жағында арнайы жасақ болды.
Бірақ тәуелсіздік монументінің маңайында жиналған елге екі жақтан келіп жиналып жатқан наразы топтың алаңға өтуіне полиция тарапынан кедергі болған жоқ.
ИРИНА СОВЕТЖАНҚЫЗЫ, Тілші:
- Жаңаөзендіктерді қолдау шарасы бүгін республиканың әр өңірінде өтіп жатыр. Облыс орталықтары, қала орталықтары, тіпті, кішігірім ауыл тұрғындары да бүгін наразылыққа шықты. Алматының бірнеше нүктесінде де ел наразылыққа шықты. Олардың талабы жалғыз - жаңаөзендіктерді қолдау, қымбатшылыққа тұсау салу.
БАҚЫТ РЫСБЕКОВ, Алматы қаласының тұрғыны:
- Главный бізге Жаңаөзен мен Атырау, Ақтауды қолдау мақсатында. Яғни қымбатшылыққа қарсымыз.
«Алға Қазақстан», «Жаңаөзен, біз сенімен біргеміз!» деп айқайлаған елдің қарасы көбейген сайын арасында кейбір адамдар полиция жасағына қарай айқайлай жүгіргенде, қасындағылар басу айтып, қайтарып отырды. Енді бір сәтте «Жігіттер, ешкімге тиіспейміз, бүлдірмейміз, шақпаймыз! Бұл - бейбіт шеру» деп айқайлаған азаматтардың даусы көптің айқайының астынан әрең естіліп жатты. Қалың ел әкімдік ғимаратына қарай жүгірген сәтте, қатты дүмпу естілді. Республика алаңы көк түтінге көмілді.
Алаңдағылар бір-біріне «маска киіңдер, ауыз, мұрындарыңды жабыңдар» деп айқайлап жатты. Артынша, мынадай кадрлар пайда болды.
Алматы полициясы қалада түнде қанша адам қамауға алынып, қанша адам жарақат алып, қанша көлік өртенгені туралы толық ақпарат таратпады. Тек ІІМ ел бойынша 95 полиция қызметкерінің жарақат алып, 37 қызмет көлік бүлінгенін айтты. Бүгін таңда қала әкімдігі ғимаратын басып кіргендердің де бейнежазбасы тарады.
Бұл кадрларға қатысты Алматы әкімдігі әлі пікір білдірмеді.
Ирина Советжанқызы, Влад Шишко
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Алматы #наразылық #митинг #СОБР