#kamranmyunis #kamranyunis #esmiramehiqızı #poeziyateatrı
#şeirlər #şiirler #sevgişeirləri #poeziya #vətənşeirləri
Esmira Mehiqızı - o küçələr vardı haa
Bəstəkar - Aqşin Əlizadə - Hüzn valsı
o küçələr vardı haaa...
gedirdik,
gəlirdik ee
enini-uzununu gözüyumma ölçməkdən
taa əzbər bilirdik ee..
elə dəyişdilər ki,
illər sonra görəndə gözümə inanmadım.
səkisini, yolunu heç mən də tanımadım.
çıxmağa bircə qarış yeri də qalmamışdı,
mənim gördüyüm dünya,
bu havada deyildi, bu boyda olmamışdı.
səkiləri enliydi... küçələri uzanıb xəyallara çıxırdı,
yağışları, qarları noğul kimi yağırdı.
hekayələri nağıl, nağılları gözəldi..
nə kəndli-şəhərliydik-
məhlə davalarında, küçələrə bölünüb-
küçəliydik, küçəli-
o küçəli, küçəli duyğuları gözəldi,
o gecəli, gecəli uyğuları gözəldi.
elə gözəliydi ki,
balkonlarda qızların oğrun-oğrun baxması,
yalandan iş görməsi..
bir oğlanın güzgünü sevdiyinin gözünə salması, qımışması....
o qızın da gülməsi..
sonra Fatma xalanın oğlana hirslənməsi,
oğlanın gizlənməsi.
sonra German dayının hörhörü gülüşləri,
Çita varıydı, Çita - bir dəli qadınıydı-
Çitanın söyüşləri..
elə gözəliydi ki..
davakar uşaqların küçələrindən keçmək,
keçib, qorxmamağımız.
ardımızca hürəndə yava küçə itləri,
qaçıb, qaçıb qorxudan geri baxmamağımız.
nə gözəl deyildi ki,
həyətlər, həyatlar da, gecələr də gözəldi.
quşları uçan damlar,
quş uçurdan adamlar, küçələr də gözəldi.
o küçələr vardı haaa..
süpürüb silirdik eee
doğurdan yıxılırdıq,
yalandan ölürdük ee..
sonra doğurdan oldu ölmək də, ayrılıq da-
neçə sərçə dostları, uşaqları itirdik.
küçələrin sonunda uşaqlığı bitirdik.
və bir-bir qapıları neçə xəbərlər döydü.
İlahi, neynədin ki,
o sərçələr də öldü.
o sərçələrlə birgə o küçələr də öldü.
ta ...o küçələr yoxdu..
üşüyürəm bayaqdan, bu küçələr soyuqdu.
əvvəllər gözümüzdə yaş olmazdı, bilirsən..
su olardı dupduru,
indi gözlərimizdə yaş var, yaş var- su yoxdu!
o küçələr vardı haaa..
sirrini, gizlisini...ahh necə sevirdik eee,
arada yığışanda,
nə goplar deyirdik ee..
böyüdük, dağılışdıq...
bəlkə də dönməyimiz çox gec oldu, gecoldu!
o boydana küçələr- yaaaaaa,, necoldu, necoldu...?
ya haçansa, hardasa...o küçələr vardı haaa..
sökdülər, dağıtdılar, tikdilər, yamadılar-
təzələnəndən sonra məni tanımadılar..
tanısaydılar, əgər
uşaqlığa açılan bir qapı açardılar.
sonra da uşaq kimi,
qollarını yan açıb üstümə qaçardılar.
o küçələr vardı haaa...
gedirdik,
gəlirdik ee..