Рет қаралды 5,016
Nazirlər Kabineti "Fiziki şəxslər tərəfindən istehsal, yaxud kommersiya məqsədləri üçün nəzərdə tutulmayan malların gömrük sərhədindən keçirilməsinin güzəştli və sadələşdirilmiş Qaydaları"nda dəyişiklik edib. Qərara əsasən, bundan sonra ölkəyə şəxsi istifadə üçün mal gətirilməsi qaydaları sərtləşdirilib. Quru yolu ilə gətirilən malların ümumi dəyər limiti 1500 dollardan 800 dollara endirilib. Həmçinin poçt və daşıyıcı şirkətlə fiziki şəxslərə gətirilən malların dəyəri 300 dollar təyin edilib. Daha əvvəl bu, 1000 dollar idi. İndiyə qədər bu xidmətlərdən yararlananlar edilən bu dəyişikliyi heç də birmənalı qarşılamayıblar.
Marketoloqlar da yeni dəyişikliyin faydasından çox, sahibkarlığa və online satışa zərər gətirəcəyi qənaətindədir. Qanunun qüvvəyə minəcəyi təqdirdə, tələblərin istehlakçıların seçim azadlığına da kölgə salacağını bildirirlər.
Məsələyə münasibət bildirən Dövlət Gömrük Komitəsinin hüquqi təminat idarəsinin rəisi Sənan Muxtarov dəyişiklikləri iqtisadiyyatda baş verən yeniliklərlə əlaqələndirib. O bildirib ki, bu cür qərarlar idxalın artırılması üçün MDB və Avropa ölkələrinin təcrübəsinə əsaslanaraq verilir. Bütün qaydalar digər ölkələrlə müqayisəli təhlillər aparılaraq tərtib edilir.
Dövlət Gömrük Komitəsindən həmçinin bildirilib ki, aparılmış iqtisadi təhlilin nəticəsi olaraq müəyyən edilib ki, son illər fiziki şəxslərin gömrük ərazisinə gətirdiyi malları ayrı-ayrı kənar şəxslərin adına rəsmiləşdirərək nəzərdə tutulmuş gömrük ödənişlərindən yayınma, həmçinin qeyd olunan malların qaçaqmalçılığı halları artıb. Bununla yanaşı, müəyyən edilmiş hədlər və miqdar daxilində idxal olunan malların gömrük ödənişlərindən azad olunması daxili bazarda həmin malların dövriyyəsinin artması ilə yanaşı, ölkə üzrə illik idxal dövriyyəsinin azalmasına, bəzi hallarda analoji malları rəsmi qaydada idxal edənlərin müflisləşməsinə səbəb olurdu. Bundan əlavə fiziki şəxslər tərəfindən istehsal, yaxud kommersiya məqsədləri üçün nəzərdə tutulmayan mallar şəklində gömrük ərazisinə güzəştli qaydada gətirilmiş mobil telefon və digər simsiz rabitə avadanlıqlarının ticarət şəbəkələrinə yönəldilməsi halları çoxalıb. Bütün bunlar qabaqlayıcı tədbirlərin görülməsi zərurəti yaradıb. Qeyd edək ki, 21 avqustda dərc olunan yeni qaydalar həmin vaxtdan 30 gün sonra qüvvəyə minir.