Когда ангелы раздают счастье-будьте дома...
Çуркуннепе кăштах тăм ÿкнĕ чух
Вăхăтсăрах ан шантăрччĕ çеçке
Сăпка юрри хуллен шăраннă чух
Йăл кулăпа çеç çывăртăр пепке.
Çут тĕнчене килсе кун курнă чух
Сăваплăхпа çеç тултăрччĕ чĕре
Пирĕштисем телей валеçнĕ чух
Килте пулма тÿр килтĕрччĕ пире.
Уйăхпала хĕвел тĕл пулнă чух
Асамлă ир çеç пултăрччĕ куллен
Юратупа чунсем киленнĕ чух
Телей тени ан кайтăрччĕ килтен.
Хуркайăксем тÿпе тĕрленĕ чух
Тунсăхпала ан тултăрччĕ чĕре
Авăтакан куккук шăпланнă чух
Килтех пулма тÿр килтĕрччĕ пире.