Toylardan milyonlar qazandı, içki onu yatağa saldı, “Qoymayın ölüm!” deyib haray çəkdi... Bağında məscid tikən qarmon ifaçısı - General polkovnik qarmonuna qızıl medalyon sancdı
"Sənət dostlarım əvvəllər içki içəndə gəlirdilər. İndi yatağa düşmüşəm, qapımı döyən yoxdur. Uşaqlarımın toyunu görə bilmədim. Ölmək istəmirəm. Qoymayın ölüm!" Toylardan milyonlar qazandı, bağında məscid tikdirdi, General polkovnik qarmonuna qızıl medalyon sancdı...
Aslan İlyasov 1948-ci ildə may ayının 22-də Salyan şəhərində anadan olub. 15 yaşından başlayaraq Salyan rayon Mədəniyyət Evində musiqiçi kimi işə başlayıb. 1980-ci ildə Bakı şəhəri Azərbaycan Konsert Birliyinə Solist kimi fəaliyyətini davam etdirib. 1990-cı ildə Azərbaycan Mədəniyyət Evinə solist kimi daxil olub.
Onu sadə bir qarmon ifaçısı obrazından çıxaran, böyüdən, yaddaşlara hkk edən həm də özünün yazdığı musiqilər idi. O, "Aslani", “Həyati”, “İndira Qandi”, “Salyanı”, “Ülviyyə” rəqsləri ilə böyük məşhurluq qazanıb.
Musiqiçinin Azərbaycan Dövlət Televeziya və Radiosunun videoteka və fonotekasında ifa etdiyi 30-a yaxın musiqinin lent yazıları saxlanılır. Onun 22-si musiqiçinin bəstələdiyi rəqslərdi. Repertuarından savayı heç nə çalmağı sevməyib.
Rayon toylarının birində iştirak edəndən bir həftə sonra Aslan İlyasova zəng gəlir. Zəng vuran toy sahiblərindən biri olur. O, bildirir ki, toy kasetinə yenicə baxıblar və Aslan müəllimin ifasını hədsiz dərəcədə bəyəniblər. Toy adamları Aslan müəllimə verilən pulun azlığı narahat edib. Onlar xahiş ediblər ki, görüşüb ona əlavə zəhmət haqqı ödəyib, səhvlərin düzəltsinlər. Ancaq o, bu təkliflə razılaşmayıb. Toy adamları bir ay ona zəng vururlar, musiqiçi isə hər dəfə bir bəhanə ilə yayınır. Nəhayət bir gün onun iştirak etdiyi toya gələn adamlar ona iki böyük qızıl medal bağışlayırlar.
Aslan İlyasovun sevilən musiqilərindən biri də "İndra Qandi" rəqsi olub. Musiqiçi bu rəqsi İndra Qandi öləndə yazıb. Özü müsahibələrində bu barədə deyir: “O qadın öldürüləndə mən pərişan oldum. Ağbirçək bir qadın idi, öldürdülər. O zaman dayana bilmədim, bir rəqs yazdım, adını da qoydum "İndra Qandi". Bu rəqs də Dövlət Fondundadır. Axır vaxtlar mobil telefonlara da qoyublar”.
Yəqin ki, Allah da belə ilahi havaları elə bu cür insanlara qismət edir, əgər bir rayon uşağı durub sn min kilometrlər uzaqda öldürülən bir insana görə kədərlənərsənsə, ağlayarsansa, ilahi mükafatını da alarsan...
Aslan İlyasovun qarmonuna bir çox məşhur və vəzifəli insanlar medalyon sancıblar. Bunlardan biri də general Məhərrəm Əliyev olub. Musiqiçi bu barədə xatirələrində deyir: “Məhərrəm Əliyevdən tutmuş digər generallara kimi hamısı mənə qızıl medalyon hədiyyə edib. Görürdülər, puldan qaçıram, çıxış yolunu qızıl medalyonda tapırdılar”
Aslan İlyasov xalq tərəfindən sevilsə də, heç bir fəxri adı olmayıb. Buna görə musiqiçi son illər çox pis olurmuş:
“Bugünkü xalq artistləri var ha, Aslan meydanda olanda onların çoxu dünyaya gəlməmişdi. Amma efirə çıxmaları ilə fəxri ad almaları bir olur. Görəsən, bu, necə olur? Mən traktorla bölgələrə gedib konsertlər vermişəm. Müharibə dövründə bölgələrdə olmuşam, hamısının video-görüntüsü var. Konsert verib, əldə etdiyim pulu imkansızların hesabına köçürmüşəm. Ancaq gedib kiminsə qapısını döyüb, kiməsə yalvarmamışam ki, mənə fəxri ad verin. Mənə adı xalqım verib. O adla da qəbirə gedəcəm. Bu boyda da haqsızlıq olar? Dünyaya gəlməyimə peşmanam. Adam nifrət edir”.
Deyilənə görə musiqiçi bir çox zərərli vərdişlərlə yanaşı içkini də çox sevirmiş. Xəstəliyinin yaranma səbəbi də pis vərdişlərə aludəçiliyi olub. Ancaq özündən gənclərə içkidən və narkotikdən uzaq durmağı tövsiyə edib. Aktyor Çingiz Əhmədov müsahibələrinin birində deyir: “Aslan İlyasov kişi qeyrətli insan idi. 7-8 il bundan qabaq biz bir tədbirə düşdük. Getsin o günlər. Mən tamam qurtarmışam o aləmlə. Aslan mənə qayıtdı ki, Çina, içkini qoy qırağa, o heç kəsə xeyir gətirməyib. Özüm özlüyümdə düşündüm ki, bu özü yeyib-içən oğlandır, indi mənə niyə elə deyir. Sən demə demək istəyib ki, cavansan, indidən qurtar bu aləmlə. Mən ondan sonra içki aləminə nifrət etdim."
Ölümündən bir neçə gün əvvəl sənətçi göz yaşları içərisində bu sözləri deyib: "Sənət dostlarım əvvəllər içki içəndə gəlirdilər. İndi yatağa düşmüşəm, qapımı döyən yoxdur. Uşaqlarımın toyunu görə bilmədim. Ölmək istəmirəm. Qoymayın ölüm!"
Sənətkar 22 dekabr 2013-cü ildə Bakı şəhərində vəfat edib. Salyan qəbiristanlığında dəfn olunub.
Ömrün dəyəri uzunluğunda deyil, izindədir. Aslan İlyasov ömrününü dərininə yaşayanlardan oldu. Ona görə də adı musiqilərinin qanadlarında uçur, şəxsiyyətinin ağırlığında qəlblərə möhür qoyur. Onu sevənlər təmnnasız insanlardır. Təmənnasız sevgilər isə əbədi yaşayır. Ruhun şad olsun, snətkar!