Биыл еліміздің тарихындағы маңызды оқиға - жергілікті мәслихаттардың құрылғанына 30 жыл. Осыған орай Қызылорда қаласында өңірлік мәслихат төрағалары мен депутаттарының қатысуымен семинар-кеңес өтті. Сегіз өңірден жиналған халық қалаулылары «Халыққа қолайлы инфрақұрылым. Жайлы шаһар жасау бастамалары» тақырыбындағы семинарда пікір алмасып, бірқатар нысандарды аралап көрді.
Өңірлерден жиылған делегацияны алдымен қала әкімі Серік Қожаниязов қабылдады. Облыс орталығының даму көрсеткіштерін баяндаған шаһар басшысы алдағы жоспарларымен бөлісті.
Семинар кеңесте қалалық мәслихаттың жұмысы таныстырылып, «Халыққа қолайлы инфрақұрылым. Жайлы шаһар жасау бастамалары» тақырыбында бірнеше баяндама тыңдалды. Қала әкімінің орынбасарлары қаланы дамытудағы тың жобаларды назарға ұсынды. Әрі қарай облыстық мәслихаттың тұрақты комиссия төрағасы Балжан Шәменова бюджетті жоспарлау мен оның орындалуын бақылау жайын кеңінен талқылады. Семинарға қатысушылар әр өңірдің ерекшелігіне байланысты кездесетін ортақ проблемаларды талдап, оның шешу жолдарын қарастырды. Сондай-ақ Сыр өңіріндегі мәслихат пен әкімдіктердің бірлесе атқарған оңды істерін үлгі етті.
Семинар қонақтары шыны зауытының құрылысымен танысты. Жылына 197 мың тонна өнім өндіретін зауытта 230-ға жуық адам еңбек етеді. Қазіргі уақытта зауытта өндірілетін өнім түрлерін көбейту мен ілеспе кәсіпорындарды құру бағытында жұмыстар жүруде. Мұнан соң депутаттар «Алтын Орда» серіктестігінің күріш ақтау және тұз өндіру зауытында болды. Бұл күрішті ақтау жұмыстарын толықтай цифрландырылған күйде іске асыратын еліміздегі алғашқы зауыт. Жылына 33 мың тоннадан астам жоғары сұрыпты Сыр салысын дайындайды.
Делегация мүшелері Қорқыт ата атындағы халықаралық терминалды да аралап көрді. Әуежай белгілі меценат Болат Өтемұратовтың демеушілігімен салынуда. Аумағы 7,5 мың шаршы метрді құрайтын әуежайда абаттандыру жұмыстары жүруде.
Облыс әкімдігіндегі ахуалдық орталықтың мүмкіндіктерімен танысқан депутаттар өңірлерді дамыту бойынша ұсыныстарын ортаға салды. Әрі әрбір аймақтағы озық тәжірибелерді енгізу арқылы тұтастай елдің дамуына атсалысу ортақ мақсат екенін тағы бір пысықтады.
Сайт - qyzylordatv.kz/ru/live
Facebook - / qyzylordatv
Instagram - / qyzylordatv
Telegram - t.me/qyzylords_tv
Tiktok - / qyzylorda_tv