Энэхүү богино хэмжээний баримтат кино нь Хавхны аяны талаар болон, анх аяныг хэн санаачилсан, хэр цар хүрээтэй явагдаж буй талаар гээд байгаль орчин болон хавх нь амьтны амьдралд ямар хүндрэл, хор нөлөөтэй болохыг онцолж харуулж байгаа юм. Ховд аймгийн Манхан сумын байгаль хамгаалах “Бөхөн”, “Гүем” экоклубын сурагчид Дэлхийн байгаль хамгаалах сангийн Монгол дахь хөтөлбөрийн газрын дэмжлэгтэйгээр “Хавх булаагүй ууланд хамаг амьтан жаргалтай” аяныг анх санаачлан өнгөрсөн жил амжилттай зохион байгуулсан билээ. Хүүхдүүд хавханд ирвэс зэрэг ховор амьтад орж хөлгүй болж байгааг малчдад тайлбарласан төдийгүй тэдэнд хэрэгтэй тогоо, бидон, түмпэн зэрэг ахуйн хэрэглээний бараагаар 160 гаруй хавх сольж авсан нь олон нийтийн анхаарлыг ихэд татсан юм. Хүүхдүүдийн энэ санаачилгыг Байгаль орчин, аялал жуулчлалын сайд дэмжиж “Хавх булаагүй ууланд хамаг амьтан жаргалтай” аяныг улс орон даяар өрнүүлэхийг уриалсан бөгөөд эхний ажил ийнхүү Ховдод амжилттай болж өндөрлөлөө.