“တိုင်းတပါးမှ ဖြန့်ချီခဲ့သော မြန်မာ့ပါတော်မူ တမ်းချင်း”
လွန်ခဲ့သော နှစ်ပေါင်း ၁၃၅ နှစ်ကျော် ယခုအချိန်တွင် မြန်မာနိုင်ငံတော်သည် ထီးကျိုးစည်ပေါက်ကာ “ထီးသုဉ်း၊ နန်းသုဉ်း၊ မြို့သုဉ်း သုည သုဉ်းသုံးဝ....” အစချီဆီးဘန်းနီဆရာတော် ဘုရားကြီး၏ သံဝေဂ လေးချိုးကြီးအတိုင်း စည်းလုံးညီညွတ်မှုမရှိရုံမျှမက စည်းကမ်းပါဖေါက်ခဲ့ကြသဖြင့် ထီးနန်းပါပျောက်ခဲ့ရလေသည်။
ထိုသို့ နယ်ချဲ့ဗြိတိသျှတို့အောက်တွင် ဝန်းသိုစော်ဘွား ဦးအောင်မြတ်၊ ဗိုလ်မင်းရောင် စသောမျိုးချစ်သူရဲကောင်းများက ဒုတ်၊ဓါး၊ သေနတ်တို့ဖြင့်တော်လှန်နေချိန်တွင် အချုပ်တန်း ဆရာဖေတို့ကဲ့သို့ အနုပညာရှင်များစွာကလည်း ဂီတလက်နက်၊ ကလောင်လက်နက်စသော ရရာလက်နက်များကို စွဲကိုင်ကာ သူ့ကျွန်အဖြစ်မှ လွတ်မြောက်စေရန် အုတ်တချပ်သဲတပွင့် အဖြစ်ပါဝင် တိုက်ပွဲဝင်ခဲ့ကြ၏။
ပါတော်မူပြီးစ ပေါ်လာသော ဆရာဖေ၏ တေးထပ်တွင် ၎င်းက ပေါက်ကွဲခါ “မြန်မာတွေ စည်းကမ်းဖေါက်၊ ထီးနန်းပျောက်ဖြစ်ပြီ၊ မှီငြမ်းထောက် အသစ်မှီတယ်၊ ညစ်ပလီလူမျိုး။ မိပစ်လို့ ဘသွေရှောင်သည်၊ ဂွကောင်တွေခွေးဖြစ်ပေါ့ဗျိုး။” ဟူ၍ ရေးသားခဲ့လေသည်။
၁၈၈၇ မှ အစောဆုံး လွပ်လပ်ရေးတိုက်ပွဲဝင် တေးသီချင်းတစ်ပုဒ်ဖြစ်သည့် “သီဟာပျံနန်းဘုံမြင့်မှာလ...” အစချီ မဒီကိုင် ဦဖူးညို၏ ဂရုဏာသံတွင်လည်း “ဘိလပ်ပိုင် မိန့်တော်ရင်းရယ်နှင့်၊ မြစ်တွင်းမှာ အောင်လံထူ၍၊ လွယ်တကူ ရှင်နှစ်ပါးကိုလ၊ ကြယ်ဥဂ္ဂါ နိမိတ်များငယ်နှင့် တက်သွား၍ ဆောင်တွင်းမှာ၊ လောင်ပြင်းစွာ ပြည်သူအပေါင်း။ ဆောင်ကြဉ်းလာသမျှ သည်ရေကြောင်း။ ။” ဟု အသည်းနာနာဖြင့် ရေးသားခဲ့ပါသည်။
ဓါတ်ပြားခေတ်သို့ ရောက်သည့်အခါတွင်လည်း အဆိုတော်များဖြစ်ကြသည့် ခင်မောင်ရင်၊ ဂီတာစိမ်းမောင်၊ ဥဩဘသောင်၊ စိန်ပါတီ၊ မကြည်အောင်တို့ကဲ့သို့ အနုပညာရှင်များက သခင်၊ သခင်မ ဘွဲ့များခံယူကာ လွပ်လပ်ရေး တိုက်ပွဲဝင် သီချင်းများကို သီဆိုဓါတ်ပြားသွင်းခဲ့ကြသည်။
ထိုအထဲမှ အခြားဓါတ်ပြားသီချင်းများကို ကျော်လွန်၍ တမူထူးခြားစွာ ပေါ်ထွက်လာသော သီချင်းတပုဒ်မှာ ဂီတစာဆို ရွှေတိုင်ညွန့်ရေး၍ အဆိုတော် စိန်ပါတီ၏ “ပါတော်မူ” ဓါတ်ပြားဖြစ်၏။ ဤဓါတ်ပြားအမှတ် RE.698 ကို ၁၉၃၉ ဧပြီလတွင် ကိုလံဘီယာ ကုမ္ပဏီ အိန္ဒိယစက်ရုံမှ ရိုက်နှိပ်ဖြန့်ချီခဲ့သည်။ စိတ်ဝင်စားစရာ ကောင်းသည်မှာ ထိုခေတ်က ဓါတ်ပြားများသည် တိုက်ရိုက်အသံသွင်းထားသည့် ဖယောင်းချပ်ကို တိုင်းတပါးတွင် သွားရောက် ကူးယူကာ ရိုက်နှိပ်ပြီးမှ မြန်မာပြည်သို့ ပြန်လည်ပေးပို့ကာ ဖြန့်ချီထုတ်ဝေရောင်းချရပါသည်။ သီချင်းသွင်းရာတွင်လည်း လျှပ်စစ်မပေါ်မှီက အဆိုတော်က အရှေ့ဆုံးမှနေ၍ တီးလုံးသံ အတိုးအကျယ်ပေါ် မူတည်၍ အနီးအဝေး သတ်မှတ်ကာ အော်လံကြီးရှေ့တွင် တိုက်ရိုက် အသံသွင်းခဲ့ကြရသည်။
ထိုသို့ ဖယောင်းပြားပေါ် အသံဖမ်းသည့် အဖွဲ့ကလည်း ပြည်ပမှ သီချင်းမသွင်းမှီ တပတ်အလိုတွင် ရောက်ရှိကာ ဓါတ်ပြားကုမ္ပဏီများနှင့် ရက်ချိန်းယူကာ တထိုင်ထဲ သွင်းခဲ့ကြ၏။ ထိုသို့မကူးယူခင် ရက်ပေါင်းများစွာ အချိန်ယူ၍ အဆိုတော်နှင့် တီးဝိုင်းသမားများကို သီချင်းရေးဆရာမှ အလိုက်နှင့် တေးသွားကို ချပေးရလေသည်။ ဤသို့ဖြင့် ဓါတ်ပြားသွင်းရာတွင် အမှားမပါအောင် ထပ်တလဲလဲလေ့ကျင့် သီဆိုရလေသည်။
ယခု ဂီတထံတျာ အနုပညာ အသံပြခန်းမှ ဖွင့်ပြပေးမည့် “ပါတော်မူ”ဓါတ်ပြားကို အသံသွင်းရာတွင် ပထမဆုံး အပိုဒ် ပထမအကျော့တွင် အဆိုတော် စိန်ပါတီမှ “ရွှေကညစ်နှင့် ရေးကာ စာကိုစီ” ဟုသီဆိုရမည့်အစား “ဧက္ကရာဇ် နဲ့ရေးကာစာကိုစီ” ဟုမှားယွင်းသီဆို မိခဲ့လေသည်။ သို့သော် ရောင်းတမ်း ဓါတ်ပြား အချပ်ပေါင်းများစွာ မြန်မာပြည်သို့ ပြန်လည်ရောက်ရှိပြီးမှ သိရှိရသည့်အတွက် စိန်ပါတီ၏ “ပါတော်မူ” သီချင်းဓါတ်ပြားကို အမှားအတိုင်း ဖြန့်ဝေခဲ့ရ၏။ ထို့ကြောင့် ယခုကဲ့သို့ ပါတော်မူနေ့နှင့် တိုက်ဆိုင်သော အခါသမယတွင် ဂီတထံတျာ အနုပညာအသံပြခန်း နှင့် Antique Collectors Haven” Facebook စာမျက်နှာမှ ပါတော်မူ ဓါတ်ပြားအား ရတနာဂီရိရှိ မြန်မာ့နောက်ဆုံးဘုရင် သီပေါမင်း၏ နောက်ဆုံးစံအိမ်တော် စက်မှုလက်မှုကျောင်းအဖြစ်မှ ပြတိုက်အဖြစ်သို့ ပြန်လည်ပြုပြင်နေစဉ် မှတ်တမ်းတင် ရိုက်ကူးထားသော သမိုင်းဝင် ရှားပါးမှတ်တမ်းများဖြင့် ဝေဝေဆာဆာ တင်ဆက်လိုက်ရပါသည်။
#သီပေါမင်း #စုဖုရားလတ် #ဒိုင်းခင်ခင်
မှတ်ချက်။ Antique Collectors Haven နှင့် ဂီတထံတျာ အနုပညာအသံပြခန်းမှ တင်ဆက်မှုများအား လွပ်လပ်စွာ မျှဝေနိုင်ပါသည်။ သို့သော် မိမိကိုယ်ပိုင်အဖြစ် တဆင့်ကူးယူခြင်းမပြုပါရန်။