Histeroskopiya haqqında Reproduktiv Sağlamlıq Mərkəzinin doktoru mama-ginekoloq Məhbubə Mirəzyeva danışır.
Histeroskopiya uşaqlıq boşluğunun optik cihaz, yəni kamera, vasitəsilə müayinə üsuludur. Müayinənin davam etmə müddəti 15-20 dəqiqədir. Əməliyyatxana şəraitində yüngül anesteziya altında icra olunur.
Histeroskopiyanın diaqnostik və operativ növləri mövcuddur. Əvvəlki müayinələr nəticəsində hər hansı bir patalogiya - endometrial polip, uşaqlıq daxili miom, uşaqlıq daxili arakəsmə və sinexiya (uşaqlıq daxili bitişmə), aşkar olunarsa pasiyentə operativ histeroskopiya əməliyyatı təyin olunur. Əməliyyat zamanı patalogiya aradan qaldırılır.
Diaqnostik histeroskopiya isə 3-4 keyfiyyətli embrion transferinə baxmayaraq uğursuz nəticə alındıqda xəstəyə təyin olunur. Bu prosedurların 30-40%-də endometrial patalogiya aşkar olunaraq əməliyyat zamanı aradan qaldırılır. Sonrakı mərhələdə isə pasiyentə növbəti süni mayalanma protokolu təklif olunur.