Зейнет жасын төмендету бойынша белсенділердің талабы орындалуға аз қалды. Еңбек министрі мен қозғалыс мүшелері ақыры бір келісімге келген секілді. Тамара Дүйсенова азаматтарды зейнетақымен қамтамасыз етудің жаңа тәсілдерін әзірлеген. Онда келесі жылдан бастап зейнетақы мөлшерінің ұлғайтылатыны жазылған. Ал бұл белсенділердің көңілінен шыққан сияқты. Дегенмен, министрдің ұсынысында зейнет жасын төмендету мәселесі қарастырылмапты. Еңбек министрінің дайындаған ұсынысын енді премьер-министрдің орынбасары Ералы Тоғжанов қозғалыс мүшелерімен бірге қарайды. Ал, экономист Меруерт Махмұтова зейнет жасын төмендету мәселесін саясаттағы популизм деп бағалап отыр.
«Қазақстан әйелдер» қозғалысы елдегі әйелдердің зейнет жасын 58-ге төмендету мәселесін былтырдан бері көтеріп келеді. Тіпті, түрлі қалаларда бейбіт шеру де жасаған еді. Қозғалыс мүшелері еңбек министрімен 5 рет кездесіп, ақыры бір келісімге келген сияқты. Соңғы рет жиналғанда Тамара Дүйсенова азаматтарды зейнетақымен қамтамасыз етудің жаңа тәсілдерін ұсынған. Алғашқысы, келесі жылдан бастап зейнетақы мөлшерлемесін ұлғайту қарастырылып жатыр. Екіншісі, «Күміс жас» жобасы бойынша әйелдерді жұмысқа орналастыру үшін бюджет қаражаты есебінен олардың жалақысын ішінара субсидиялау көзделген. Бұл әйелдердің зейнетке шыққанға дейін жинақтаушы зейнетақы жүйесіне барынша белсенді қатысуына мүмкіндік береді. Жоба әсіресе еңбек өтілі мен зейнетақы қорында жинағы ақшасы аз әйелдер үшін тиімді болады деп болжайды министр. Тамара Дүйсенованың ұсынысы қозғалыс мүшелеріне ұнаған секілді.
Қарлыға Ахметбекова, «Қазақстан әйелдер» қозғалысының мүшесі:
- Тамара Дүйсенова көрсеткен презентация сәл де болса қуантты. Біздің үніміз естілген екен ғой дедік. Зейнетақы көлемі өсуі мүмкін деген жаңалықтың өзіне қуандық. Енді, біз Ералы Тоғжановпен кездескенде де біз зейнет жасын төмендетуді талап ететін боламыз.
Жанар Балабекова, «Қазақстан әйелдер» қозғалысының мүшесі:
- Бізді мысалы шетелдіктермен салыстырады ғой. Ой шетелде 60 жасқа дейін істейді. Ал, олардың пенсиясымен біздің пенсияны неге жақындаттырмайды? Біздікі қазір алатындары 50-60 мың болса, оларда 1 мың доллар, 2 мың доллар алады кем дегенде.
Әйелдердің зейнетке шығу жасын 58-ге төмендету мәселесі Еңбек министрлігінен бұрын парламент қабырғасында да бірнеше рет көтерілді. Ал экономист Меруерт Махмұтова бұл құбылысты саяси популизмге теңейтінін айтады. Маман Қазақстан экономикасы зейнет жасын төмендетуге шамасы жетпейді деген ойда. Экономист сөзінше, зейнетақыны келесі жылдан емес, дәл қазірден бастап көтеру керек. Себебі, келесі жылы инфляция көтерілгенде, жоғарылатқан зейнетақының мөлшері аз болып қалады дейді.
МЕРУЕРТ МАХМҰТОВА, Экономист:
- Дәл осы 6 пайыз индексация жасайда зейнетақыны. Бірақ қалғанын қоспайды. Биыл бағаның бәрі өкіріп тұр. Сондықтан тура қазір, дәл осы инфляцияға байланысты зейнетақыны, балалар алып отырған төлемақыны көтеріп жатса, адамдар осы өсіп жатқан бағамен күн көретіндей мүмкіншілік болады.
Әйелдердің зейнет жасын 58-ге қысқарту бойынша белсенді топпен дүйсенбі күні Ералы Тоғжанов кездесетін болды. Қозғалыс мүшелері премьер-министрдің орынбасарымен жолыққанда зейнет жасын төмендету мәселесін тағы да көтермекші.
Өмір Серікбекұлы, Нұркен Тоқмурзин
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#зейнетақы #ЗейнетЖас