After 20 years, by O. Henry.
20 വർഷങ്ങൾക്കു ശേഷം
ചെറുകഥ
ഡ്യൂട്ടിയിലുണ്ടായിരുന്ന പോലീസുകാരൻ നഗര വീഥിയിലൂടെ തികഞ്ഞ ഗാംഭീര്യത്തോടെ, എന്നാൽ ആകർഷകമായ, അളന്നു തൂക്കിയ കാൽവെപ്പുകളോടെ മുന്നോട്ടു നടന്നു. അദ്ദേഹത്തിൻറെ ആ ഗാംഭീര്യം പ്രദർശനാത്മകമായിരുന്നില്ല, മറിച്ച് നിരന്തര പരിശീലനത്തിലൂടെ ആർജ്ജിച്ച ശീലമായിരുന്നു. ആ സമയത്ത് കാഴ്ചക്കാരും കുറവായിരുന്നല്ലോ. സമയം കഷ്ടിച്ചു രാത്രി 10 മണി കഴിയുന്നതേയുള്ളൂ. പക്ഷേ മഴയുടെ രുചിയുള്ള തണുത്ത കാറ്റിൻറെ അലകൾ നഗരവീഥിയിൽ നിന്നും ജനങ്ങളെ ഏതാണ്ട് പൂർണമായും ഒഴിവാക്കിയിരുന്നു.
വഴിയരികിലെ ചില കടകളുടെ വാതിലുകൾ പരിശോധിച്ച്, പസഫിക് സമുദ്രതീരത്തേക്കു നീളുന്ന ആ വീഥിയുടെ മുക്കുംമൂലയും തൻറെ നിരീക്ഷണത്തിലാക്കി കൈവശമിരുന്ന ലാത്തിവടി വിദഗ്ധമായി കറക്കിക്കൊണ്ട് ഒരു വശത്തേക്ക് അല്പം ചെരിവുള്ളതോ എന്നു തോന്നിക്കുന്ന ഉയരമാർന്ന ആ പോലീസ് ഓഫീസറെ കണ്ടാൽ സമാധാനസംരക്ഷകൻറെ പ്രതിരൂപം എന്നേ പറയുവാനാകുമായിരുന്നുള്ളൂ.