Жауынгерлік су көлігі Каспийдегі Қазақстанның аумағын минадан қорғайтын болады. Қазір 15 адамнан тұратын экипаж мүшесі Ресейде дайындықтан өтіп жатыр.
«Қазақстан» зымыранды-артиллериялық кемесі кезекті жауынгерлік жорыққа аттанды. Бұл жолы әскерилер ашық теңізде 2 апта жүреді. Басты мақсат - Каспийдегі ел шекарасын күзетіп, экономикалық мүддемізді қорғау. Сонымен қатар үздіксіз жаттығулар жасап, шеберліктерін шыңдайды. Кемеден зымыран ұшырып, оқ атуға машықтанады.
Әскери теңіз күштері элиталы әскери құрылым. Сондықтан мұнда арнайы сынақтан өткен жауынгерлер ғана Отан қорғауда. Кеме экипажы сайдың тасындай іріктелген 29 жігіттен тұрады. Барлығының жоғары не арнаулы білімі бар. Үш тілді жетік біледі.
Ғазиз Сұлтанқұлов, «Қазақстан» зымыранды-артиллериялық кеме экипажының мүшесі
-«Теңіз ауруы» деген ауру бар. Ол мысалы, теңіздің толқындарынан кейбір адамның жүрегі айнып, басы ауырады. Бұл жерге сондай теңіз күштеріне төтеп бере алатын мықты деген азаматтар таңдап алынған. Сонымен қатар біздегі әскерилердің бәрі дерлік жүзе білуі керек. Өйткені теңізде кез келген жағдайлар болуы мүмкін.
Теңіз сарбаздары кемедегі бос уақытын тиімді өткізеді. Арасында домбыра тартып, бой жазады.
Ашық теңізде ұзақ жүретіндіктен әскерилердің ішер тамағы жақсы болуға тиіс. Ас мәзірінде төрт түліктің етінен бастап, балық, көкөніс, жеміс-жидек пен балға дейін бар. Бүгінгі түскі асқа сорпа мен палау әзірленуде. Біздің түсіру тобына арнап тәтті нан да пісірілді.