Қазақстанмен Ресей шекарасындағы жағдай ерекше бақылауға алынды. Барлық жауапты мемлекеттік орган өкілдері осындай мәлімдеме жасады. Өйткені соңғы 2 күнде Ресей тарапынан біздің елге беттеген көліктер ағыны 20 пайызға артқан. Қазақстанға келушілер немен айналысады? Тілшіміз солардың бірімен тілдескен еді.
ҚОСТАНАЙДА ПӘТЕРДІ ЖАЛҒА БЕРУ БАҒАСЫ ЕКІ ЕСЕГЕ ӨСТІ
Ресейліктер келіп жатқан қақпаның бірі Қостанай облысы. Соңғы тәулікте онда бір мыңнан астам Ресей азаматы келген. Сәйкесінше, облыс орталығында кешелі бері пәтер жалдағысы келетін ресейліктер саны көбейді. Жыл басынан бері баспана жалдау құны 25-30 пайызға өскен еді. Ал, бүгін 2 есеге бір-ақ қымбаттады. Бір бөлмелі пәтердің айлық ақысы 80-90 мыңнан 170 мың теңгеге дейін өсті. Қалада ұзақ мерзімге жалға берілетін баспана табу қиын. Өйткені, студенттерге жатақханаларда орын жетіспейді. Ал, бүгін бір тәулікке жалға берілетін пәтерлер де қалмаған.
РЕСЕЙЛІКТЕР АТЫРАУ ОБЛЫСЫНА ТРАНЗИТТІК АЙМАҚ РЕТІНДЕ АҒЫЛУДА
Ал мұнайлы өлке көрші елден ағылғандар үшін транзиттік қала. Атырау-Астрахань шекарасында сағаттап кезек күтіп, елге келушілер Астана, Алматы шаhарлары мен Солтүстік өңірлерге ағылуда. Қоныстану кезінде бір-біріне қолқанат болу үшін шетелдіктер тіпті әлеуметтік желілерде ортақ чат ашып қойған көрінеді. Ол жерде тұрғын-үй, жұмыс пен өзге де қажеттіліктер жайлы ақпараттарды талқылайды. Ресейдегі мобилизациядан кейін үдере көшкендердің арасында отбасылы азаматтар аз. Жыл басынан бергі есеп бойынша солтүстіктегі көрші елден облыстағы білім ордаларына 11 мектеп оқушысы орналасқан. Десе де батыста қалып бизнес бастағысы келетіндер де жоқ емес.
ЭКОНОМИСТ: ҚАЗАҚСТАН-РЕСЕЙ ШЕКАРАСЫНЫҢ ЖАБЫЛУЫ САУДА-САТТЫҚТЫ ҚҰЛДЫРАТАДЫ
Қазақстан-Ресей шекарасының жабылуы сауда-саттықты құлдыратып, елімізде қымбатшылықты ушықтыруы мүмкін. Қарапайым, азық-түлігі мен киім-кешегі импортқа тәуелді біздің елдің экономикасы мұндай өзгеріске төтеп бере алмайды. Бұл- экономист Бауыржан Ысқақовтың пікірі. Қазақ-Ресей арасындағы тауар айналым 7 айда 13,7 млрд долларға жеткен. Сондықтан, «Үкімет өзімізді ішкі өніммен толық қамтымайынша, бұл әрекет сәтсіз болады» ,- дейді.
ФИНЛЯНДИЯҒА АҒЫЛҒАН РЕСЕЙЛІКТЕРДІҢ ҚАТАРЫ КҮРТ КӨБЕЙДІ
Финляндия шекарадан ресейліктерді өткізбеу туралы шешім қабылдауы мүмкін. Себебі осы ел арқылы Еуропаға өтуге ниетті азаматтардың саны күрт көбейген. ЗКТ: Күні кеше фин үкіметі ресейліктерді шекарадан өткізбеу мәселесін қарастыруға кіріскенін мәлімдеді. Әзірге олардың қандай шешім қабылдайтыны белгісіз. Екі ел арасындағы шекара ұзындығы - 1300 шақырым. Ең көлемді жерді иеленіп жатқан көршілер Еуропалық одақтың ең басты уайымына айналды. Соғыс басталғалы осы ел арқылы шекара асқандар саны өскені белгілі. Апта ортасынан бастап тіпті көбейіп кетті. Дәл қазір оларға Финляндия ешқандай қысым көрсете алмайды.
Telegram Qaz - t.me/atamekenbusiness_qaz
Telegram Rus - t.me/atamekenbusiness
Instagram - / atameken.business
Instagram - / inbusinesskz
Facebook - / atamekentv.kz
Facebook - / inbusiness.kz
Tik-Tok - / atamekenbusiness
«Atameken Business» online: inbusiness.kz/ru/tv
Cайт - inbusiness.kz
Atameken Business Programs - / @atamekenbusinessprogr...
#AtamekenBusiness #Inbusinesskz #НовостиКазахстана