Ұлтымыздың әуелеген әсем әндері, күмбірлеген күй мен жыр жауһарларынан сусындап, төл өнерімізден рухани нәр алу үшін «Күн көзі» радиосында «Ән маржаны» бағдарламасын назарларыңызға ұсынамыз! Қазақтың күй мен дәстүрлі ән, жырлары біздің асыл мұрамыз, құнды жәдігерлеріміз. Негізі ұлтымыздың бүкіл тыныс-тіршілігі өнермен өрнектелген. Ғасырдан ғасырға асыл мұра болып жеткен дәстүрлі әндеріміз ата-баба салтына адалдықтың айқын көрінісі десекте болады. Себебі қазақ әндерін, өнерін дамытуда Абайдан бастап, Жаяу Мұса, Ақан сері, Мұхит, Нартай, Кенен мен Әсет, Естайлардың есті әндері шоқтығы биік туындылар, тарихи танымдық қазына. Әрине басқа да дүлділдеріміз көп. Олардың әндері, орындау шеберліктерімен алдағы уақытта тыңдап, танысамыз. Ал біздің басты мақсатымыз бүгінгі ұрпақты баға жетпес мол музыкалық мұрамызбен сусындатып, ұлттық өнердегі ұрпақ сабақтастығын жалғастыруға үлес қосу. “Құлақтан кіріп, бойды алар, Әсем ән мен тәтті күй. Көңілге түрлі ой салар, Әнді сүйсең, менше сүй”, - деп Абай атамыз өлеңіне арқау еткен әсем ән мен тәтті күйдің құдіреті талай жанның жүрегін тербеп, рухани азық болғаны рас. Талай ғасырдың сүзгісінен өтіп, қаймағы бұзылмай бүгінге жеткен дәстүрлі ән-күйдің тарихы тереңнен тамыр тартады. Ал қазір Ән маржандарына кезек беріп, сіздерге теңдесі жоқ өнер туындыларын тыңдатуға асықпын. Алғашқы ән Жүсіпбек Елебековтің орындауында Ақан серінің әні «Құлагер». Жүсіпбек Елебеков әнші, Қазақстанның халық әртісі. Қарағанды облысында туып, өнер жолын Семей өңірінде бастаған. Халық арасында Әміренің ізін жалғаған талант деген аты бар. Себебі ән айту таланты ерекше дарын иесі болған. Орындау ерекшелігінің арқасында халық әндерінің көбісі қазақ ауыз әдебиетінің классикасына айналған.