Рет қаралды 10,107
Киелі уақыт кітабын қолымызға алып, кері парақтайтын болсақ, өз заманында өркениет пен мәдениеттің шыңына жеткен алып мемлекеттер мен гүлденген шаһарлардың елесі елестейді көз алдымызға. Бұл күндерде ол шаһарлар сағымға бөкті. Дүние жаратылғалы бері мыңдаған өркениет өртке оранып, қаншама қалалар құмға жұтылды. Сұрапыл соғыстарда жау оғы қирата алмаған берік қамалдар уақыттың алдында тізе бүгіп, құмға жұтылды. Адамзат тарихында ғасырлар мен жылдардың тезінен аман өтіп, уақытқа жұтылмай, топыраққа көмілмей бүгінгі күнге дейін сақталған қалалар мен қорғандар да бар. Солардың бірі Сауран қалашығы.
Ортағасыр дәуірінде Сырдария өзенінің ортаңғы ағысындағы аймақ Түркістан өлкесі деп аталғаны тарихтан белгілі. Сол өлкенің өркениеттің озық деңгейіне жетіп, гүлденген қалаларының бірі Сауран шаһары еді. Сауран - ХІІ ғасырда ірі сауда орталығы ретінде іргетасы қаланған. Түркістанның солтүстік-батыс жағындағы 30 шақырым жерде орналасқан орта ғасырдағы қалалардың бірі.
Арабтың географы әл-Магдиси: «Сауран (Савран) - үлкен шаһар, ол бірінен соң бірі салынған жеті қабырғамен қоршалған. Рабаты бар, мешіті ішкі шаһарда орналасқан. Ол оғыздар мен қыпшақтардан қорғауға арналған шекаралық шаһар» деп жазған.
2000 жылдан аса тарихи бар киелі Сауран 2021 жылы қайта түлеп, жаңа ауданға айналды. Тарихи қаланың атын алған Сауран ауданы тарихи сәтті бастан кешіруде.
Тарих ескірмейді, қайта, уақыт өткен сайын құндылығы мен бағасы арта түседі. Бүгінгі күнде, көне Сауранның жаңа Сауранмен бірге жаңа тарихы жазылуда. Ал Жаңа Сауран көне Сауранмен бірге жаңарып, бірге жаңғыруда! Ескі мен жаңаның арасындағы үйлесім жарқын болашаққа жетелейтіні сөзсіз.
#Тарих #деректіфильм #Сауран #Түркістан