ҚР МӘДЕНИЕТ САЛАСЫНЫҢ ҮЗДІГІ НҰРБОЛ ЧЕРУБАЕВТАН ӘН ШАШУ!
22 желтоқсан күні Үржар аудандық мәдениет үйінде белгілі әнші Нұрбол Черубаевтың "Ән шашу" атты шығармашылық кеші өтті.
Нұрбол Ақынбекұлы 2008 жылы аудандық мәдениет үйінде еңбек жолын бастап, бүгінгі таңда музыкалық жетекші қызметін атқарып жүр. Көптеген республикалық және халықаралық байқауларда жүлделі орын алып, ауданымыздың атағын шығарып жүрген белгілі өнерпаздың бұл екінші шығармашылық кеші.
Ең үлкен қуанышымыз - Нұрбол Ақынбекұлы Черубаев ҚР "Мәдениет саласының үздігі" атағын алып, кешінде салтанатты түрде марапатталды.
Н.Черубаевты Үржар ауданы әкімінің орынбасары Б.Тұрлыбеков құттықтап, ауданы әкімінің Алғыс хатын және ауданымыздың "Абырой" төсбелгісін табыс етті. "Аманат" партиясының Үржар ауданы бойынша төрағасы Р.Жүнісова, ішкі саясат бөлімінің басшысы Е.Бейсенов, мәдениет және тілдерді дамыту бөлімінің басшысы Ж.Андасова, мәдениет үйінің директоры Қ.Сатмұхамбетов, туған жері Жанай ауылдық округінің әкімі Ж.Сағымбаев пен Жанай ОМ ұжымы, Бақты ауылдық округінің әкімі А.Чушеков, "Аруана" әжелер ансамблі, әріптестері құттықтады.
Әнші "Көңіл толқыны" халық аспаптар оркестрінің (жетекшісі Д.Шаяхметов) сүйемелдеуімен Т.Базарбаевтың "Тамаша", Абайдың "Айттым сәлем, қаламқас", Д.Вердидің "Песенка герцога", Ш.Қалдаяқовтың "Ақмаңдайлым" әндерін шалқыта шырқады. Эстрада бағында орындалған М.Салықовтың "Таңғы шық", Д.Гробанның "Perte", Х.Ризабектің "Арман" және "Аруана" әжелер ансамблімен бірге "Тойбазар" әндерінен Нұрболдың әр елдің әндерін, әртүрлі ән жанрын шебер меңгерген әнші екеніне көзіміз жетті.
"Скиф" вокалды-аспаптық ансамблімен (жетекшісі Р.Тұрсынбаев) бірлесе айтқан "Асыл ана", "Әке арманы" , "Туған жер" әндерін көрермен жылы қабылдады. Концертте кеш иесінің композиторлық қырына да тәнті болдық. Нұрбол Ақынбекұлы - "Тәуелсіз Қазағым менің", Е.Жақыпбектің сөзіне "Сұлу дүние", Ж.Бейсеновтің сөзіне "Не жетсін-ай ауылға", А.Абылқасымовтың сөзіне "Ұлы Абай", Б.Бағдатұлының сөзіне "Қазақ тойы" және С.Туғановтың сөздеріне жазылған "Беу Әсет", мемлекеттік қызметшілер туралы "Ел деп соққан жүрегі", "Отаным -алмалы Бестерек" әндерінің және осы кеште тұңғыш рет орындалған "Ән ғұмыр" әндерінің авторы.
Концертте "Ғұмыр" тобы, "Сонар" және "Наз" би ансамбльдері мен шәкірттері Айым, Гүлім, Нұрым Шакеевалар, Жандос Оразхан, балалары Ділнұр Нұрболқызы мен Ердос Нұрболұлы өнер көрсетті.